قورعانىس مينيسترلىگى باتىس قازاقستان وبلىسىندا ۇشقان درونداردىڭ قۇلاۋىن رەسەي-ۋكراينا كونفليكتىمەن بايلانىستىردى، دەپ حابارلايدى "ادىرنا" ۇلتتىق پورتالى «زا نامي ۋجە ۆىەحالي» باسىلىمىنا سىلتەپ.
مينيسترلىك وكىلدەرىنىڭ ايتۋىنشا، قازاقستان اۋماعىندا درونداردىڭ پايدا بولۋىنىڭ ەڭ ىقتيمال سەبەبى – ولاردى رەسەي-ۋكراينا قاقتىعىسى بارىسىندا قولدانۋ. مۇنداي ينتسيدەنتتەر باسقا مەملەكەتتەردە، سونىڭ ىشىندە رۋمىنيا، مولدوۆا، بەلارۋس، بولگاريا، پولشا جانە حورۆاتيادا دا بولعان.
قازىرگى ۋاقىتتا قازاقستان قورعانىس مينيسترلىگى شەتەلدىك سەرىكتەستەرمەن كونسۋلتاتسيالار وتكىزىپ، درونداردىڭ مۇمكىن يەلەرىن انىقتاۋدى جالعاستىرۋدا. سونىمەن قاتار، ۇشۋ تراەكتورياسىن وزگەرتۋ ماقساتىندا تەحنيكالىق ارالاسۋ نۇسقاسى قاراستىرىلۋدا.
مينيسترلىكتىڭ مالىمدەمەسىنە سايكەس، باتىس قازاقستان وبلىسىندا درونداردىڭ قۇلاۋى فاكتىلەرى بويىنشا تەرگەۋ جۇرگىزىلۋدە. بۇل تەرگەۋ قر قىلمىستىق كودەكسىنىڭ 464-بابى 1-بولىگى – «ۇشۋ ەرەجەلەرىن بۇزۋ نەمەسە ۇشۋعا دايىندىقتى بۇزۋ» بويىنشا جۇرگىزىلۋدە. تەرگەۋ جۇمىسى قازاقستان رەسپۋبليكاسىنىڭ ىشكى ىستەر مينيسترلىگىنىڭ اسكەري-تەرگەۋ دەپارتامەنتى مەن قارۋلى كۇشتەرىنىڭ ماماندارىنىڭ قاتىسۋىمەن جۇزەگە اسىرىلۋدا.
قورعانىس مينيسترلىگى بۇل وقيعالاردىڭ ەشقانداي ادام قازاسىنا نەمەسە ماتەريالدىق زالالعا اكەلمەگەنىن اتاپ ءوتتى. سونىمەن قاتار، قازاقستاننىڭ اۋە قورعانىس جۇيەسى شتاتتىق رەجيمدە جۇمىس ىستەپ، اۋە كەڭىستىگىن باقىلاۋدى كۇشەيتۋ ءۇشىن قوسىمشا شارالار قابىلداۋدا.
ەسكە سالا كەتسەك، باتىس قازاقستان وبلىسىندا بىرنەشە رەت درونداردىڭ قالدىقتارى تابىلدى. 18 اقپان كۇنى ۇيالى اۋىلىندا، 18 ناۋرىزدا اتامەكەن اۋىلىندا جانە 25 ناۋرىزدا جانىبەك اۋدانىندا درونداردىڭ بولىكتەرى تابىلعان.
