“نە مولچي" قورىنىڭ جەتەكشىسى دينا سمايىلوۆا ء(تاڭسارى) چەرنوگوريادان بوسقىن مارتەبەسىن سۇراعان. بۇل تۋرالى قازاقستاننىڭ باس پروكۋراتۋراسى جاريالادى، دەپ حابارلايدى “ادىرنا” ۇلتتىق پورتالى.
«15 ءساۋىر كۇنى چەرنوگوريا سوتى سمايىلوۆانى قاماۋدان بوساتتى. بۇل شەشىم ونىڭ چەرنوگوريادان بوسقىن مارتەبەسىن بەرۋ تۋرالى ءوتىنىشىنىڭ ءالى قارالماۋىنا بايلانىستى قابىلدانعان»، — دەلىنگەن حابارلامادا.
ايتا كەتەيىك، دينا سمايىلوۆا 2021 جىلى قازاقستاننان كەتىپ قالعان. ىشكى ىستەر مينيسترلىگى 2023 جىلدىڭ سوڭىندا دينا سمايىلوۆانىڭ ۇستىنەن التى قىلمىستىق ءىس قوزعالعانىن، ولاردىڭ اراسىندا "الاياقتىق", "كورىنەۋ جالعان اقپارات تاراتۋ" مەن "جەكە ومىرگە قول سۇقپاۋ قۇقىعىن بۇزۋ" باپتارى بارىن مالىمدەگەن. پروكۋراتۋرا قور مەن سمايىلوۆانىڭ ەسەپشوتتارىن بۇعاتتاعان.
سمايىلوۆا ءۇش جىلدان اسا ۋاقىتتان بەرى وتباسىمەن بىرگە شەتەلدە تۇرىپ جاتىر. قازاقستان وعان حالىقارالىق ىزدەۋ جاريالاعان ەدى.
وسى ايدا ول چەرنوگوريادا ۇستالدى. كەيىن سول ەلدىڭ جوعارعى سوتى دينا سمايىلوۆانى قازاقستانعا ەكستراديتسيالاۋدان باس تارتقان.
