“Ne Molchı" qorynyń jetekshisi Dına Smaıylova (Táńsári) Chernogorııadan bosqyn mártebesin suraǵan. Bul týraly Qazaqstannyń bas prokýratýrasy jarııalady, dep habarlaıdy “Adyrna” ulttyq portaly.
«15 sáýir kúni Chernogorııa soty Smaıylovany qamaýdan bosatty. Bul sheshim onyń Chernogorııadan bosqyn mártebesin berý týraly ótinishiniń áli qaralmaýyna baılanysty qabyldanǵan», — delingen habarlamada.
Aıta keteıik, Dına Smaıylova 2021 jyly Qazaqstannan ketip qalǵan. Ishki ister mınıstrligi 2023 jyldyń sońynda Dına Smaıylovanyń ústinen alty qylmystyq is qozǵalǵanyn, olardyń arasynda "alaıaqtyq", "kórineý jalǵan aqparat taratý" men "jeke ómirge qol suqpaý quqyǵyn buzý" baptary baryn málimdegen. Prokýratýra qor men Smaıylovanyń esepshottaryn buǵattaǵan.
Smaıylova úsh jyldan asa ýaqyttan beri otbasymen birge shetelde turyp jatyr. Qazaqstan oǵan halyqaralyq izdeý jarııalaǵan edi.
Osy aıda ol Chernogorııada ustaldy. Keıin sol eldiń joǵarǵy soty Dına Smaıylovany Qazaqstanǵa ekstradıııalaýdan bas tartqan.
