فوتو: Report.az
ارمەنيا پرەمەر-ءمينيسترى نيكول پاشينيان الماتى دەكلاراتسياسىنىڭ ارمەنيا مەن ازەربايجان اراسىنداعى بەيبىتشىلىكتى ورناتۋدا ماڭىزدى ءرول اتقارعانىن مالىمدەدى. بۇل تۋرالى ول تاۋەلسىز مەملەكەتتەر دوستاستىعىنا (تمد) مۇشە مەملەكەتتەر باسشىلارى كەڭەسىنىڭ وتىرىسىندا ايتتى، دەپ حابارلايدى “ادىرنا”.
پاشينياننىڭ سوزىنشە، 1991 جىلعى 21 جەلتوقساندا قابىلدانعان الماتى دەكلاراتسياسى تمد-نىڭ نەگىزگى قۇجاتتارىنىڭ ءبىرى سانالادى. ونىڭ قاعيداتتارى ارمەنيا مەن ازەربايجان اراسىنداعى مەملەكەتتىك شەكارانى دەليميتاتسيالاۋ ۇدەرىسىندە دە باسشىلىققا الىنعان.
ارمەنيا پرەمەر-ءمينيسترى 2024 جىلى ەكى ەلدىڭ مەملەكەتتىك شەكارانى دەليميتاتسيالاۋ جونىندەگى كوميسسيالارىنىڭ بىرلەسكەن قىزمەتى تۋرالى ەرەجەگە قول قويىلىپ، ونىڭ راتيفيكاتسيالانعانىن ەسكە سالدى.
«بۇل ەرەجە تاۋەلسىز ارمەنيا مەن تاۋەلسىز ازەربايجان اراسىندا جاسالعان العاشقى ەكىجاقتى زاڭدى كۇشى بار قۇجات بولدى. وندا ەكى ەلدىڭ ءتيىستى كوميسسيالارى مەملەكەتتىك شەكارانى دەليميتاتسيالاۋ ۇدەرىسىنىڭ نەگىزگى قاعيداتى رەتىندە الماتى دەكلاراتسياسىن باسشىلىققا الاتىنى بەكىتىلگەن»، – دەدى نيكول پاشينيان.
پرەمەر-مينيستر ەكى ەل اراسىندا بەيبىتشىلىك ورناعانىن اتاپ ءوتىپ، كولىك-لوگيستيكا سالاسىنداعى ىنتىماقتاستىققا دا توقتالدى. ونىڭ ايتۋىنشا، ازەربايجان تەمىرجولى ارميان جۇكتەرىن تاسىمالداۋعا ءبىر جىلعا جۋىق ۋاقىتتان بەرى اشىق.
سونىمەن قاتار، پاشينيان «ترامپ باعىتى» (TRIPP) جوباسىنىڭ جۇزەگە اسىرىلۋى ارمەنيا مەن ازەربايجان اراسىندا تىكەلەي تەمىرجول قاتىناسىن اشۋعا مۇمكىندىك بەرەتىنىن ايتتى.
ايتا كەتەيىك، الماتى دەكلاراتسياسى 1991 جىلعى 21 جەلتوقساندا الماتى قالاسىندا قابىلدانعان. قۇجات پوستكەڭەستىك مەملەكەتتەردىڭ تمد اياسىنداعى ىنتىماقتاستىعىنىڭ نەگىزگى قاعيداتتارىن ايقىنداپ، كەڭەس وداعىنىڭ ىدىراۋىنان كەيىنگى جاڭا ساياسي كەزەڭنىڭ قالىپتاسۋىنا نەگىز بولدى.
