Qazaqstan ulttyq quramasynyń úzdik boksshylarynyń biri Sáken Bıbosynov Reseıdiń Habarovsk qalasynda ótken Konstantın Korotkovty eske alýǵa arnalǵan halyqaralyq týrnırde altyn júldege ıe boldy, dep habarlaıdy “Adyrna” ulttyq portaly.
Bul — Qazaqstan quramasynyń atalmysh týrnırdegi alǵashqy “altyn” medali.
54 kelige deıingi salmaq dárejesinde synǵa túsken Bıbosynov aqtyq synda reseılik Denıs Palshınmen qolǵap túıistirip, úsh raýndqa sozylǵan tartysty jekpe-jekte qazylar alqasynyń biraýyzdy sheshimimen jeńiske jetti. Osylaısha ol jarys chempıony atanyp, qarsylasy kúmis júldemen shekteldi.
Jartylaı fınalda Sáken Ózbekstan boksshysy Farıozbek Dýsmatovty 5:0 esebimen senimdi túrde utty. Aıta keteıik, Farıozbek — eki dúrkin Olımpıada chempıony Hasanboı Dýsmatovtyń týǵan inisi.
