«AMANAT» فراكتسياسىنىڭ دەپۋتاتى رينات زايىتوۆ ءماجىلىستىڭ كەشەگى جالپى وتىرىسىندا العاشقى دەپۋتاتتىق ساۋالىن پرەمەر-ءمينيستردىڭ ورىنباسارى التاي كولگىنوۆكە جولدادى، دەپ حابارلايدى “ادىرنا” ۇلتتىق پورتالى.
ول ءوز ساۋالىندا مادەنيەت سالاسى قىزمەتكەرلەرىنىڭ جالاقىسىن كوتەرۋ ماسەلەسى جايلى ايتتى.
رينات زايىتوۆتىڭ ايتۋىنشا، بۇگىندە مادەنيەت قىزمەتكەرلەرى مۇلدە ەسكەرۋسىز قالىپ وتىر.
«مەملەكەتىمىزدىڭ يدەولوگياسىن دۇرىس جۇرگىزۋدە جانە وتانىمىزدى الىس-جاقىن شەتەلدەرگە تانىستىرۋدا مادەنيەتتىڭ اتقارىپ جاتقان جۇمىسى از ەمەس. رەسپۋبليكامىز بويىنشا ەلەۋلى ەڭبەك ەتىپ جاتقان 56 تەاتر، 20 فيلارمونيا، 267 مۇراجاي، 3891 كىتاپحانا بار. ول از دەسەڭىز قازاقستان بويىنشا قانشاما مادەنيەت ۇيلەرى جانە تاعى سول سياقتى بىرنەشە ونەر ۇجىمدارى دا بار.
ع. مۇسىرەپوۆتىڭ: «ادام – ونەردى قانشالىقتى جاقسى كورسە، سونشالىقتى قورعاۋعا مىندەتتى» دەگەن ناسيحات ءسوزى بار.
وكىنىشكە قاراي، ءبىز بۇگىنگى كۇندە مەملەكەتتىڭ ايناسى بولىپ وتىرعان مادەنيەت قىزمەتكەرلەرىن مۇلدەم ەسكەرۋسىز قالدىرۋدامىز»، - دەپ اتاپ ءوتتى ول.
سونىمەن قاتار، مادەنيەت سالاسىنىڭ قىزمەتكەرلەرى قاتارىندا ساحنادا ونەر كورسەتەتىن تۇلعالار عانا ەمەس، سولاردىڭ جاعدايىن جاساپ وتىرعان ساحنا سىرتىنداعى ەڭبەك ادامدارى دا بار ەكەنىنە توقتالدى.
«ولار مەملەكەتىنە شىنايى ماحابباتپەن قاراپ، مادەنيەتكە بار ىقىلاسىمەن قىزمەت ەتەتىن: ساحنا تەحنيكتەرى، كوستيۋمەرلەر، گريمەرلەر، جارىق تۇسىرۋشىلەر، دىبىستاۋشى دەگەن سياقتى مىڭداعان ادامدار. جانعا باتاتىن ءبىر جايت، بۇل اتالعان قىزمەتكەرلەر ءالى كۇنگە دەيىن ساناتى جوعارىلاپ، جالاقىسى ءوسىپ جاتقان ۇستازدار، دارىگەرلەر سياقتى ماماندار قاتارىنان دا ورىن العان جوق.
قازىرگى تاڭدا قاي مەكەمەنى الساڭىز دا مادەنيەت سالاسى قىزمەتكەرلەرىنىڭ جالاقىسى 60 مىڭ تەڭگەدەن باستالىپ، 100 مىڭ تەڭگەگە جەتەر جەتپەس مەجەدەن اسا الماي تۇر. ەڭبەكاقىنىڭ تومەندىگى بىلىكتى مامانداردىڭ جۇمىستان ءوز ەركىمەن كەتىپ، مادەنيەت وشاقتارىنىڭ جۇمىسىن تۇرالاتۋعا اكەلىپ سوعادى.
قۇرمەتتى التاي سەيدىرۇلى، وسى ورايدا، مەن قازاقستان رەسپۋبليكاسى ۇكىمەتىنىڭ «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» 2015 جىلعى 31 جەلتوقسانداعى № 1193 قاۋلىسىنىڭ قوسىمشاسىنا مادەنيەت، ارحيۆ جانە كىتاپحانا قىزمەتكەرلەرىنىڭ كوەفيتسەنتتەرىن وزگەرتىپ، جالاقىلارىن وسىرۋلەرىڭىزدى سۇرايمىن.
قۇرمەتتى التاي سەيدىرۇلى، ءسىز الەۋمەتتىك-مادەني دامۋ كوميتەتىنىڭ وتىرىسىندا بىرلەسىپ جۇمىس جاساۋعا ۋادە بەرگەن ەدىڭىز جانە دە قايتا جاساقتالعان مينيسترلەر كابينەتى «AMANAT» پارتياسىنىڭ سايلاۋالدى باعدارلاماسىن تولىقتاي ىسكە اسىرۋعا ەڭبەكتەنەتىنىن حابارلاعانسىز.
سول سەبەپتى مەنىڭ ساۋالىم وڭ شەشىمىن تابادى دەپ سەنەمىن»، - دەپ تۇيىندەدى رينات زايىتوۆ.
