سەمەي قالاسىندا مەكتەپ مۇعالىمى 8-سىنىپ وقۋشىسىن زورلاعانى ءۇشىن ءومىر بويىنا باس بوستاندىعىنان ايىرىلدى. بۇل تۋرالى اباي وبلىسى سوتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
سوت پروتسەسى جابىق تۇردە ءوتتى. ءىس ماتەريالدارىنا سايكەس، 2024 جىلعى شىلدە ايىنىڭ سوڭىندا مۇعالىم سەمەي قالاسىنىڭ وڭ جاعالاۋىندا ورنالاسقان كولىكتىڭ ىشىندە قىزدى زورلاعان.
ەر ادام ءوز كىناسىن مويىنداعان جوق، ءوزىن اقتاۋدى سۇرادى. الايدا سوت وعان ءومىر بويىنا باس بوستاندىعىنان ايىرۋ جازاسىن تاعايىندادى. ۇكىم زاڭدى كۇشىنە ەنگەن جوق.
ونىڭ ۇستالعانى تۋرالى 2024 جىلدىڭ قاراشا ايىندا بەلگىلى بولدى. سول كەزدە ونىڭ جاسى 32-دە ەكەنى، مەكتەپتە باستاپقى اسكەري دايىندىق ءپانىنىڭ مۇعالىمى بولىپ جۇمىس ىستەيتىنى حابارلانعان. جابىرلەنۋشى – 8-سىنىپ وقۋشىسى. قالالىق ءبىلىم ءبولىمىنىڭ مالىمەتىنشە، قىز مەكتەپكە بارىپ ءجۇر. ونىڭ اتا-اناسىنا بالا قۇقىقتارى جونىندەگى ۋاكىلگە جانە پسيحولوگيالىق قولداۋ ورتالىعىنا جۇگىنۋ ۇسىنىلعان.