قازاقستان فۋتبول فەدەراتسياسى ءالي اليەۆتى ۇلتتىق قۇرامانىڭ باس باپكەرى ەتىپ تاعايىندادى، دەپ حابارلايدى "ادىرنا" ۇلتتىق پورتالى Tengri Sport سىلتەپ.
وسىعان دەيىن ول باس باپكەردىڭ مىندەتىن ۋاقىتشا اتقارىپ كەلگەن بولاتىن.
اليەۆ Tengri Sport تىلشىسىمەن اڭگىمەسىندە بۇل اقپاراتتى راستادى جانە كەشە عانا قازاقستان فۋتبول فەدەراتسياسىمەن رەسمي تۇردە كەلىسىمشارتقا قول قويعانىن ايتتى. الايدا كەلىسىمشارتتىڭ ەگجەي-تەگجەيى قۇپيا بولىپ قالۋدا، سەبەبى باپكەر قۇپيالىلىق تۋرالى قۇجاتقا قول قويعان.
ء"يا، مەن رەسمي تۇردە قازاقستان قۇراماسىنىڭ باس باپكەرىمىن. كەلىسىمشارت تۋرالى مالىمەت بەرە المايمىن. قۇپيالىلىق تۋرالى قۇجاتقا دا قول قويدىم. كەشە قول قويىپ، رەسمي تۇردە تىركەلدىم", – دەدى اليەۆ.
ايتا كەتەيىك، ول بۇل قىزمەتكە 2024 جىلدىڭ 31 قاڭتارىندا ۋاقىتشا تاعايىندالعان بولاتىن. ول رەسەيلىك مامان ستانيسلاۆ چەرچەسوۆتىڭ ورنىنا كەلگەن ەدى. چەرچەسوۆ كەزىندە قازاقستان قۇراماسى التى ويىن قاتارىنان گول سوقپاعان، بۇل ەل تاريحىنداعى ەڭ ءساتسىز كورسەتكىشتەردىڭ ءبىرى رەتىندە تىركەلگەن.
ءالي اليەۆ جاتتىقتىرۋىمەن قازاقستان قۇراماسى 2026 جىلعى الەم چەمپيوناتىنا ىرىكتەۋ اياسىندا ەكى ماتچ وتكىزدى. 23 ناۋرىز كۇنى ۋەلس استاناسى كارديففتەگى "كارديفف سيتي" ستاديونىندا وتكەن ويىندا قازاقستان قۇراماسى 3:1 ەسەبىمەن جەڭىلىپ قالدى. ال 26 ناۋرىز تۇنىندە ليحتەنشتەينگە قارسى ويىندا ۇلتتىق قۇراما 0:2 ەسەبىمەن جەڭىسكە جەتىپ، ۇزاق ۇزىلىستەن كەيىن العاش رەت ىرىكتەۋ كەزەڭىندە جەڭىس تويىن تويلادى.
بۇل – قازاقستان قۇراماسىنىڭ الەم چەمپيوناتىنىڭ ىرىكتەۋ كەزەڭىندەگى سوڭعى 11 جىلدان استام ۋاقىت ىشىندەگى العاشقى جەڭىسى. بۇعان دەيىنگى جەڭىس 2013 جىلدىڭ 6 قىركۇيەگىندە فارەر ارالدارىنا قارسى وتكەن ماتچتا (2:1) تىركەلگەن.
