قازاقستاندا قورعانىس-ونەركاسىپتىك كەشەندى (قوك) دامىتۋ قورىن كاپيتالداندىرۋ جۇمىستارى جۇرگىزىلۋدە. بۇل تۋرالى قر پرەمەر-ءمينيسترى ولجاس بەكتەنوۆ دەپۋتاتتىق ساۋالعا بەرگەن جاۋابىندا ايتتى، دەپ حابارلايدى "ادىرنا" ۇلتتىق پورتالى.
ۇكىمەت باسشىسى اتاپ وتكەندەي، بۇگىنگى تاڭدا قوردىڭ جارعىلىق كاپيتالىن ۇلعايتۋ ماسەلەسى كۇن تارتىبىندە تۇر. وسى ماقساتتا رەسپۋبليكالىق بيۋدجەتتەن 120 ملرد تەڭگە بولۋگە ءوتىنىم دايىندالدى. سونىمەن قاتار قىتاي، ءباا، تۇركيا، كاتار، سينگاپۋر سىندى ەلدەردىڭ ينۆەستورلارىمەن ينۆەستيتسيا تارتۋ بويىنشا كەلىسسوزدەر جۇرگىزىلۋدە.
سالانى تەحنيكالىق رەتتەۋ جۇيەسىن بىرىزدەندىرۋ ءۇشىن 2024 جىلدىڭ قاراشاسىندا ساۋدا جانە ينتەگراتسيا مينيسترلىگى قوك سالاسىنداعى تەحنيكالىق باقىلاۋ جۇيەسىن قۇرۋعا باعىتتالعان جول كارتاسىن بەكىتتى. وندا زەرتحانالىق سىناقتارعا جاتاتىن قارۋ-جاراق پەن اسكەري تەحنيكانىڭ ناقتى تىزبەسىن انىقتاۋ جانە 2026 جىلعا دەيىن بىرىڭعاي تەحنيكالىق باقىلاۋ ورتالىعىن قۇرۋ قاراستىرىلعان.
سونىمەن قاتار، يندۋستريا جانە قۇرىلىس مينيسترلىگى جەكە قورعانىس قۇرالدارىن سىناۋعا ارنالعان زەرتحانانى قۇرۋ جۇمىسىن دا باستادى. بۇل ماقساتتا 2024 جىلعى 23 قىركۇيەكتە «Steel Manufacturing» جشس بازاسىندا چەحيالىق Prototypa-ZM, s.r.o. كومپانياسىمەن 10 ملرد تەڭگەگە تەحنولوگيالىق جابدىقتاردى جەتكىزۋ تۋرالى كەلىسىمشارت جاسالدى. قۇرال-جابدىقتار 2025 جىلدىڭ تامىز ايىندا جەتكىزىلەدى دەپ جوسپارلانۋدا. زەرتحانا 2026 جىلدىڭ اقپانىندا ىسكە قوسىلادى.
