14 ساۋىردە قىرعىزستان سىرتقى ىستەر مينيسترلىگى ماسكەۋدە قىرعىز ازاماتتارىنىڭ نە سەبەپتى جاپپاي ۇستالعانىن انىقتاۋ ماقساتىندا رەسەيدىڭ بىشكەكتەگى ەلشىسى سەرگەي ۆاركۋنوۆتى شاقىرتتى، دەپ حابارلايدى «ادىرنا» ءتىلشىسى.
مينيسترلىك ءمان-جايدى ءتۇسىندىرۋدى سۇراپ، ەلشىگە نوتا تاپسىردى.
«رەسەي تاراپىنا قۇقىق قورعاۋ ورگاندارى جۇرگىزگەن وپەراتسيانىڭ، سونداي-اق ازاماتتارعا قارسى كۇش قولدانۋدىڭ سەبەبى تۋرالى اقپارات بەرۋ جانە كۇش قولدانۋ نەگىزسىز بولعان جاعدايدا وسى وقيعاعا بايلانىستى ماسكەۋ قالاسىنىڭ قۇقىق قورعاۋ ورگاندارىنىڭ وكىلدەرىنە قاتىستى ءتيىستى شارالار قولدانۋدى سۇرايتىن رەسمي نوتا تابىستالدى»، - دەلىنگەن حابارلامادا.
ودان بولەك، مينيسترلىك قىرعىزستان ازاماتتارىنىڭ قۇقىقتارىن قورعاۋ جانە ۆەدومستۆودا ەكى ەلدىڭ قارىم-قاتىناسىنا زيان تيگىزۋى مۇمكىن وسىنداي جاعدايلارعا جول بەرمەۋ جونىندە شارالار قابىلداۋدى سۇرادى.
ەسكە سالايىق، بۇعان دەيىن الەۋمەتتىك جەلىدە ماسكەۋدەگى «بودروست» مونشا كەشەنىندە قىرعىزستاندىق ميگرانتتارعا جاسالعان قورلىق تۋرالى اقپارات تاراعان ەدى. سول كۇنى مونشادا بولعان قىرعىز ازاماتتارى ەش سەبەپسىز تاياق جەگەندەرىن مالىمدەدى. زارداپ شەگۋشىلەردىڭ ءبىرى پوليتسيا قىزمەتكەرلەرىنىڭ بەس ساعاتتان وتكەننەن كەيىن عانا وقيعا ورنىنا كەلگەنىن جەتكىزدى. ايتۋىنشا، سول كەزدە مونشادا شامامەن قىرعىزستاننىڭ 60 ازاماتى بولعان.
رەيد ناتيجەسىندە، رەسمي دەرەكتەر بويىنشا، 24 ادام ۇستالعان. ولاردىڭ كەيبىرىنە "كوشى-قون زاڭىن بۇزعانى ءۇشىن" ايىپپۇل سالىنعان.
