Mańǵystaý oblysynda 17 jastaǵy Saǵyndyq Qýanyshbekovtiń jumbaq jaǵdaıda qaza tapqan, dep habarlaıdy “Adyrna” ulttyq portaly Lada.kz-ke siltep.
Marqumnyń týystary bul oqıǵany jaı ǵana jazataıym jaǵdaı emes, qasaqana jasalǵan qylmys dep esepteıdi.
Oqıǵa 8 sáýir kúni bolǵan. Sol keshte Saǵyndyq úıinen shyǵyp ketken. Túngi saǵat 23:00-23:30 shamasynda onyń dostary balanyń denesin úıge ákelip tastaǵan. Olar Saǵyndyqtyń jaı ǵana qulap qalǵanyn aıtqan. Alaıda denesinde soqqy izderi bolǵanyn baıqaǵan týystary birden kúmándanǵan.
Marqumnyń týysy, zańger Ajar Abdıl bul jaıtty Facebook paraqshasynda jarııalap, Mańǵystaý oblystyq polıııa departamentine resmı saýal joldady. Onyń aıtýynsha, Saǵyndyq sol keshte dostarymen júrgen. Al dostary keıinirek aýyldaǵy úlken balalar tarapynan qysym bolǵanyn moıyndaǵan. Olar jasóspirimderdi qatarǵa turǵyzyp, urǵanyn, Saǵyndyqtyń soqqydan keıin qulap, esinen tanǵanyn aıtqan.
Marqumnyń týysy Sáken Qýanyshbekovtiń sózinshe, dene Aqtaýdaǵy máıithanaǵa jiberilgen. Sot-medıınalyq saraptama ólimniń kúsh qoldanýdan bolýy múmkin ekenin kórsetken. Biraq resmı qorytyndy áli jarııalanǵan joq.
«Bul – zorlyq-zombylyqpen kelgen ólim. Ony qatty urǵan. Dostarynyń telefondarynan barlyq jazbalar men hattar óshirilgen. Tek meniń baýyrymnyń telefonyn asha almaǵan, onda bári saqtalǵan. Saraptama nátıjesin kútip otyrmyz», – deıdi Sáken.
Qaza tapqan balanyń jaqyndary Saǵyndyqtyń ólimin zorlyq-zombylyqpen kelgen ólim retinde tanýdy talap etip otyr. Olar barlyq kúdiktilerdiń qamaýǵa alynyp, tergeý ádil júrgizilýi qajet ekenin aıtyp, qoǵamnan qoldaý suraıdy.
