استانادا جەڭىل رەلستى كولىك (LRT) جوباسىنىڭ قۇرىلىسى بەلسەندى تۇردە جالعاسۋدا. پرەمەر-مينيستر ولجاس بەكتەنوۆكە جوبانىڭ قازىرگى جاي-كۇيى 112-ستانسا الاڭىندا تانىستىرىلدى، دەپ حابارلايدى "ادىرنا" ۇلتتىق پورتالى.
ۇكىمەتتىڭ مالىمەتىنشە، وتكەن جىلدىڭ قورىتىندىسى بويىنشا ەستاكادا، اسپالى كوپىر مەن بارلىق ستانسالاردىڭ تەمىربەتون كونسترۋكتسيالارى تولىق اياقتالعان. جوبانىڭ قاجەتتىلىكتەرىن قامتاماسىز ەتۋ ماقساتىندا استانادا ارنايى شپال ءوندىرىسى ىسكە قوسىلىپ، بۇگىندە 35 مىڭنان استام شپال دايىندالدى. جالپى جوبا بويىنشا 87,6 مىڭ شپال قاجەت.
ء“بىز ب-55 ماركالى بەتون مەن الدىن الا كەرنەلگەن ارماتۋرا تەحنولوگياسىن قولدانامىز. بۇل قۇرىلىمداردىڭ مىقتىلىعىن ارتتىرىپ، ايازعا توزىمدىلىگىن كۇشەيتەدى”، – دەلىنگەن ۇكىمەت حابارلاماسىندا.
قازىرگى ۋاقىتتا قۇرىلىس الاڭىندا رەلستەر توسەلىپ، ۇزىندىعى 2 شاقىرىم بولاتىن ۋچاسكەدە جانە وپتيكالىق تالشىقتى جەلىدە جۇمىس اياقتالعان. جوبادا قازىر 2 مىڭعا جۋىق ادام ەڭبەك ەتۋدە، ال جاز ايلارىندا بۇل سان 5 مىڭ مامانعا دەيىن جەتكىزىلەدى.
“CTS” كومپانياسىنىڭ باسقارما توراعاسى اسىلبەك دۇيسەباەۆتىڭ ايتۋىنشا، بيىل قىركۇيەك ايىندا LRT جەلىسىندە جولاۋشىسىز سىناق پويىزدارى ىسكە قوسىلادى. جوبا حالىقارالىق GoA4 ستاندارتىنا ساي جۇزەگە اسىرىلۋدا، بۇل 6 ايلىق تەستىلەۋ مەرزىمىن قاجەت ەتەدى.
ساپار بارىسىندا پرەمەر-مينيستر LRT بويىنداعى اباتتاندىرۋ جوسپارىمەن دە تانىستى. جوبا اياسىندا اۋەجاي مەن رىسقۇلوۆ كوشەسىنە دەيىن ءىرى اعاشتار مەن بۇتالار وتىرعىزىلىپ، اۆتوماتتى سۋارۋ جۇيەسى ورناتىلادى. قابانباي باتىر داڭعىلى مەن سىعاناق كوشەسىنە دەيىنگى ايماقتا بالالار جانە سپورت الاڭدارى، جاياۋ جۇرگىنشىلەر جولدارى سالىنادى. 2-تەمىرجول ۆوكزالى باعىتىندا اۆتوتۇراقتار، ۆەلوجولدار جانە كوگالداندىرۋ جۇرگىزىلەدى.
