Astanada jeŋıl relstı kölık (LRT) jobasynyŋ qūrylysy belsendı türde jalǧasuda. Premer-ministr Oljas Bektenovke jobanyŋ qazırgı jai-küiı 112-stansa alaŋynda tanystyryldy, dep habarlaidy "Adyrna" ūlttyq portaly.
Ükımettıŋ mälımetınşe, ötken jyldyŋ qorytyndysy boiynşa estakada, aspaly köpır men barlyq stansalardyŋ temırbeton konstruksiialary tolyq aiaqtalǧan. Jobanyŋ qajettılıkterın qamtamasyz etu maqsatynda Astanada arnaiy şpal öndırısı ıske qosylyp, bügınde 35 myŋnan astam şpal daiyndaldy. Jalpy joba boiynşa 87,6 myŋ şpal qajet.
“Bız B-55 markaly beton men aldyn ala kernelgen armatura tehnologiiasyn qoldanamyz. Būl qūrylymdardyŋ myqtylyǧyn arttyryp, aiazǧa tözımdılıgın küşeitedı”, – delıngen ükımet habarlamasynda.
Qazırgı uaqytta qūrylys alaŋynda relster töselıp, ūzyndyǧy 2 şaqyrym bolatyn uchaskede jäne optikalyq talşyqty jelıde jūmys aiaqtalǧan. Jobada qazır 2 myŋǧa juyq adam eŋbek etude, al jaz ailarynda būl san 5 myŋ mamanǧa deiın jetkızıledı.
“CTS” kompaniiasynyŋ basqarma töraǧasy Asylbek Düisebaevtyŋ aituynşa, biyl qyrküiek aiynda LRT jelısınde jolauşysyz synaq poiyzdary ıske qosylady. Joba halyqaralyq GoA4 standartyna sai jüzege asyryluda, būl 6 ailyq testıleu merzımın qajet etedı.
Sapar barysynda Premer-ministr LRT boiyndaǧy abattandyru josparymen de tanysty. Joba aiasynda äuejai men Rysqūlov köşesıne deiın ırı aǧaştar men būtalar otyrǧyzylyp, avtomatty suaru jüiesı ornatylady. Qabanbai batyr daŋǧyly men Syǧanaq köşesıne deiıngı aimaqta balalar jäne sport alaŋdary, jaiau jürgınşıler joldary salynady. 2-temırjol vokzaly baǧytynda avtotūraqtar, velojoldar jäne kögaldandyru jürgızıledı.
