جەتىسۋ وبلىسى قۇرىلعاننان بەرى مەديتسينالىق-سانيتارلىق العاشقى كومەك نىساندارىمەن 81 ەلدى مەكەن قامتىلدى، ال دارىگەر تاپشىلىعى 20,3%-عا تومەندەدى. بيىل تاعى 72 ەلدى مەكەندە جاڭا مەديتسينالىق مەكەمەلەر بوي كوتەرەدى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
وبلىس قۇرىلعالى بەرى وڭىردە كەربۇلاق اۋدانىنىڭ سارىوزەك اۋىلىندا 250 ورىنعا ارنالعان ەمحانا، كوكسۋ اۋدانى اقشاتوعان، ەڭبەكشىقازاق اۋىلدارىندا، الاكول اۋدانى قامىسقالا اۋىلىندا، پانفيلوۆ اۋدانى شەجىن اۋىلىندا 4 فەلدشەرلىك-اكۋشەرلىك پۋنكت، اقسۋ اۋدانى ساعابۇيەن اۋىلىندا دارىگەرلىك امبۋلاتوريا، التىنارىق اۋىلىندا مەدپۋنكت سالىندى. سول سياقتى 58 بلوك-ءمودۋلدى كەشەن ورناتىلدى، سونىڭ ىشىندە رەسپۋبليكادا تۇڭعىش رەت ەسكەلدى اۋدانى قارابۇلاق اۋىلىندا جانە پانفيلوۆ اۋدانىنىڭ جاركەنت قالاسىندا بلوك-مودۋلدىك كونسترۋكتسيانى قولدانا وتىرىپ تۇرعىزىلعان جەدەل جانە شۇعىل مەديتسينالىق كومەك قوسالقى ستانتسياسى دا بار. وسىنداي نىساندار بيىل تاعى 4اۋداندا – قاراتال اۋدانىنىڭ ۇشتوبە قالاسىندا، كەربۇلاق اۋدانىنىڭ سارىوزەك اۋىلىندا، كوكسۋ اۋدانىنىڭ بالپىق بي اۋىلىندا، تەكەلى قالاسىندا بوي كوتەرەدى.
وعان قوسا «اۋىلداعى دەنساۋلىق ساقتاۋدى جاڭعىرتۋ» جوباسى شەڭبەرىندە 15 نىساننىڭ قۇرىلىسى اياقتالىپ، تاعى 44-ءىنىڭ قۇرىلىسى جالعاسۋدا. سونىمەن قاتار قاراتال اۋدانى ۇشتوبە قالاسىندا دەمەۋشىلەر ەسەبىنەن 50 ورىندى دارىگەرلىك امبۋلاتوريا بوي كوتەردى.
سونىمەن بىرگە ءۇش جىل ىشىندە 7 نىسانعا كۇردەلى جوندەۋ جۇرگىزىلسە، بيىل تاعى 7-ەۋى كۇردەلى جوندەۋدەن وتكىزىلەدى.
قابىلدانعان وسىنداي شارالاردىڭ ارقاسىندا دەنساۋلىق ساقتاۋ سالاسىندا بەيىمدەلگەن عيماراتتاردىڭ سانى 209-دان 127-گە قىسقاردى.
سونداي-اق بيىل بەيىمدەلگەن نەمەسە جالعا الىنعان عيماراتتا وتىرعان 72 مەديتسينالىق مەكەمە ءۇشىن جاڭا نىساندار سالىنىپ، جابدىقتاۋ جوسپارلانعان. وعان قوسا بيىل تالدىقورعاندا ينۆەستور كومپانيانىڭ قارجىسىنا 200 ورىندى زاماناۋي ونكولوگيالىق ديسپانسەردىڭ قۇرىلىسى باستالادى.
وبلىستا مەديتسينالىق كادرلار جەتىسپەۋشىلىگى ماسەلەسىن شەشۋگە دە ەرەكشە كوڭىل بولىنۋدە. وبلىس اكىمىنىڭ تاپسىرماسىنا سايكەس رەسپۋبليكادا العاشقى بولىپ وڭىردەگى اۋىلدىق جەرگە جۇمىسقا كەلگەن دارىگەرلەرگە 10 ملن. تەڭگەدەن، قالالىق جەرگە 5 ملن. تەڭگەدەن ءبىر رەتتىك كوتەرمەاقى بەرۋ جۇيەسى ەنگىزىلدى.
وسى ماقساتقا 2024 جىلى جەرگىلىكتى بيۋدجەتتەن 495 ملن. تەڭگە ءبولىندى. سونىڭ ناتيجەسىندە بىلتىر كوتەرمەاقى 75 دارىگەرگە تولەندى، ونىڭ 24-ءى اۋىلدىق جەردە، 51-ءى قالالىق جەردە جۇمىس ىستەيدى. وسىنداي شارالاردىڭ ارقاسىندا وبلىستا كادر تاپشىلىعىنىڭ سانى 202-دەن 161-گە، ياعني 20,3%-عا تومەندەدى.
اۋىلدىق جەرگە كەلگەن دارىگەردىڭ ءبىرى - 17 جىلدىق ەڭبەك ءوتىلى بار حيرۋرگ نۇرمۇحامەد بايجانوۆ. ول قابانباي اۋىلىنداعى الاكول اۋداندىق ورتالىق اۋرۋحاناسىنىڭ بولىمشەسىنە جۇمىسقا تۇرعان.
- ارينە، جۇمىس ىستەۋ وڭاي ەمەس، كىشىگىرىم جاراقاتتاردى قوسپاعاندا، كۇنىنە 2-3 كۇردەلى وتا جاسالادى. بىراق، ءبىز، دارىگەرلەر بۇل جولدى ءوزىمىز تاڭدادىق. ءبىزدىڭ باستى مىندەتىمىز – ادامدارعا كومەكتەسۋ. مەنىڭ بالالار حيرۋرگى، تراۆماتولوگى، بالالار ورتوپەدى، بالالار ۋرولوگى باعىتىندا 4 سەرتيفيكاتىم بار. سوندىقتان ەمىزۋلى جاستاعى نارەستەلەردەن باستاپ ءتۇرلى وپەراتسيالار جاساي الامىن. ءبىزدىڭ بولىمدە لاپاروسكوپ قۇرىلعىسى بار، بۇل كەز كەلگەن اۋرۋحانادا بولا بەرمەيدى. مۇنداي زاماناۋي مەديتسينالىق جابدىقتى پايدالانۋ جۇمىسىمىزدى ەداۋىر جەڭىلدەتىپ، ناۋقاستىڭ وپەراتسيادان كەيىنگى وڭالتۋ پروتسەسىن جەدەلدەتەدى، - دەيدى مامان.
جالپى وبلىستاعى مەديتسينا نىساندارىنىڭ بازاسىندا كارديوحيرۋرگيا، ونكولوگيا بويىنشا كۇردەلى وپەراتسيالار جاسالۋدا.
ماسەلەن، وبلىستىق كارديولوگيالىق ورتالىقتا بۇگىنگى كۇنى جوعارى تەحنولوگيالى مەديتسينالىق كومەكتىڭ 20 ءتۇرى كورسەتىلەدى. وتكەن جىلى مۇندا 380 وتا جاسالسا، بيىل تاعى 450-دەن استام وتا جاسالادى دەپ كۇتىلۋدە. اتاپ وتەرلىگى، كلينيكادا جاساندى ينتەللەكتىسى بار جۇرەك رەسينحرونداۋ تەراپياسى قولدانىلادى. سول سياقتى بيىلعى جىلدان باستاپ كارديوحيرۋرگيالىق وتالار بالالارعا دا جاسالا باستادى.
بۇل رەتتە تالدىقورعانداعى وبلىستىق پەريناتالدىق ورتالىقتا 2023 جىلى اشىلعان «قامقورلىق» ەرتە ارالاسۋ وڭالتۋ ورتالىعىن دا اتاپ وتۋدە بولادى. بۇل يننوۆاتسيالىق ورتالىقتا نەيرو-ورتوپەديالىق اۋرۋلارى بار، ونىڭ ىشىندە تسەرەبرالدى سال اۋرۋى بار بالالاردى وڭالتۋدىڭ الەمدىك ۇزدىك ادىستەمەلەرى مەن زاماناۋي تاسىلدەرى ەنگىزىلگەن. نىسان 2023-2024 جىلدارى 215 بالاعا وڭالتۋ شارالارىن جۇرگىزسە، بيىل جىل باسىنان بەرى 51 بالانى قابىلدادى.
ماتەريالدىق-تەحنيكالىق بازانىڭ جايىنا كەلسەك، ءۇش جىل ىشىندە مەديتسينالىق مەكەمەلەردى قاجەتتى قۇرال-جابدىقپەن قامتۋ دەڭگەيى 93% جەتتى. 2022-2024 جىلدارى 133 جەدەل جاردەم كولىگى ساتىپ الىنسا، سونىڭ كوپشىلىگى اۋىلدىق جەرلەرگە جىبەرىلدى، بيىل تاعى 29 سانيتارلىق كولىك الىنادى دەپ جوسپارلانعان.
