ەڭبەكشىقازاق اۋدانىندا كۇيەۋىنەن زورلىق-زومبىلىق كورگەن ونداعان ايەلدىڭ ءىسى «ارىز جازبادى» دەگەن سەبەپپەن جابىلىپ قالعان، دەپ حابارلايدى "ادىرنا" ۇلتتىق پورتالى.
بۇل تۋرالى بالا قۇقىقتارى جونىندەگى ۋاكىل دينارا زاكيەۆا مالىمدەدى.
زاكيەۆا اۋداندا سوڭعى 3 اي ىشىندە كۇيەۋىنەن اۋىر سوققى العان، ءولىم اۋزىنان قالعان ايەلدەردىڭ 61 ءىسى تىركەلگەنىن ايتادى. ونىڭ ىشىندە 36 ايەل اۋىر دەنە جاراقاتىن العانىنا قاراماستان، ىستەرى جابىلعان نەمەسە قۇجاتتار جويىلاتىن تىزىمگە جىبەرىلگەن.
«مۇنداي ىستەر جابىرلەنۋشىنىڭ ارىزى بولماسا دا قارالۋى ءتيىس. بۇل – زاڭدا جانە جوعارعى سوتتىڭ قاۋلىسىندا ناقتى جازىلعان»، – دەيدى زاكيەۆا.
ۋاكىلدىڭ ايتۋىنشا، جەدەل جاردەم مالىمەتتەرى اراسىندا 19 جاستاعى اياعى اۋىر كەلىنشەكتىڭ باسى جارىلىپ، سۋيتسيدكە بارعانى، 14 جاستاعى قىزدى اكەسىنىڭ سوققىعا جىققانى انىقتالعان. اتالعان ىستەر تەك ۋاكىلدىڭ ارالاسۋىنان كەيىن عانا قايتا قوزعالعان. دينارا زاكيەۆا اۋدان دەڭگەيىندەگى الەۋمەتتىك قورعاۋ، ءبىلىم بەرۋ جانە پوليتسيا سالاسىنىڭ وكىلدەرى قابىلدانعان زاڭ نورمالارىن ورىنداماي وتىرعانىن اتاپ ءوتتى. ول بۇل جاعدايدى دەرەۋ شەشۋدى تالاپ ەتىپ، ايەلدەر مەن بالالاردىڭ قۇقىعىن قورعاۋعا شاقىردى.
