2025 جىلعى 9 ساۋىردە ءال-فارابي اتىنداعى وقۋشىلار سارايىندا دۇنيە جۇزىنەن كەلگەن عالىمدار، ءبىلىم بەرۋ سالاسىنىڭ ساراپشىلارى، جاس زەرتتەۋشىلەر مەن وقۋشىلار باس قوسقان ەرەكشە عىلىمي ءىس-شارا – III حالىقارالىق عىلىمي فورۋم ءوز جۇمىسىن باستادى.
العاشقى قۇتتىقتاۋ سوزدەردى استانا قالاسىنىڭ ءبىلىم باسقارماسىنىڭ باسشىسى سەنگازاەۆ كاسىمحان سەنگازاەۆيچ پەن رەسپۋبليكالىق «دارىن» عىلىمي-پراكتيكالىق ورتالىعىنىڭ ديرەكتورى تۇرسىنوۆ گاجدەمبەك قۋانىشۇلى ايتتى. ولار جاستاردىڭ عىلىمعا دەگەن قىزىعۋشىلىعى مەن ىنتاسىن جوعارى باعالاپ، ءبىلىم مەن يننوۆاتسيانىڭ ەل بولاشاعىنداعى ورنى تۋرالى اتاپ ءوتتى.
پاريج ۋنيۆەرسيتەتىنىڭ پروفەسسورى، فرانتسيا ۇلتتىق عىلىم اكادەمياسىنىڭ مۇشەسى پەر لەنا مىرزا جاستاردىڭ عىلىمي الەۋەتىن دامىتۋداعى يننوۆاتسيالىق ءبىلىم بەرۋ جوبالارىنىڭ ماڭىزىن ەرەكشە اتاپ ءوتتى. ول فورۋمعا ونلاين رەجيمدە قاتىسىپ، حالىقارالىق ىنتىماقتاستىق پەن جاستاردىڭ جاھاندىق عىلىمداعى ءرولىن تىلگە تيەك ەتتى.
قازاقستاننان ءلاززات ابايقىزى – ICSC پرەزيدەنتى، قر پاتەنتتىك سەنىمدى وكىلى، “بالالار عىلىمدا” جوباسىنىڭ جەتەكشىسى رەتىندە ءسوز سويلەپ، عىلىم مەن ءبىلىمنىڭ تۇراقتى دامۋ ماقساتىنداعى ماڭىزدىلىعىنا توقتالدى. ول عىلىمي جازبا مەن اكادەميالىق ءتىلدى مەڭگەرۋدىڭ ماڭىزىن اتاپ، وقۋشىلارعا اعىلشىن تىلىندە جوبا قورعاۋ باعىتىندا جۇرگىزىلگەن دايىندىق جۇمىستارى تۋرالى باياندادى.
فورۋم بارىسىندا مانزۋر سومرو (پاكىستان) قازىرگى جاستاردىڭ عىلىمي-زەرتتەۋ جۇمىستارىنا دايىندىعى جايىندا ءوز ويىن ءبىلدىردى.
سونداي-اق، جاڭا زەلاندياداعى وكلەند ۋنيۆەرسيتەتىنىڭ دوكتورانتى شىڭعىس اقنيازوۆ «استرونوميا جانە كوسموناۆتيكا: ايعا ساپار جانە كەرى ورالۋ» اتتى پرەزەنتاتسياسىندا عارىشتىق زەرتتەۋلەردىڭ قازىرگى جەتىستىكتەرى مەن بولاشاعىنا شولۋ جاسادى.
فورۋمدا حالىقارالىق بايقاۋلاردىڭ جەڭىمپازى اتانعان وقۋشىلاردىڭ عىلىمي جوبالارىن اعىلشىن تىلىندە تانىستىرۋ ءساتى بولدى. ماسەلەن، كوكشەتاۋلىق وقۋشى ارۋجان جانىبەك توپىراقتىڭ قۇرامىن تالدايتىن جانە سۋدى ۇنەمدەيتىن «جەرۇيىق» قۇرىلعىسىن تانىستىردى. بۇل جوبا كورەيادا وتكەن حالىقارالىق بايقاۋدا التىن مەدالعا يە بولعان.
بۇل فورۋم – عىلىممەن ەرتە اينالىسقان جاستاردىڭ جەتىستىكتەرگە ەرتە جەتۋىنىڭ ايقىن دالەلى. ءبىلىم بەرۋ جۇيەسىندەگى جاڭاشىلدىقتار مەن عىلىمي وي-پىكىرلەر توعىسقان بۇل الاڭ – بولاشاق كوشباسشىلار مەن جاڭالىق اشۋشى بۋىننىڭ قالىپتاسۋىنا سەرپىن بەرەتىن ماڭىزدى پلاتفورما.
قازاقستانداعى ءبىلىم جۇيەسى جاڭا بەلەستەرگە كوتەرىلۋدە، جانە بۇل فورۋم — سول جەتىستىكتەرگە اپارار جولدىڭ ءبىر بولىگى.
