قىتاي استاناسىندا كورشىلەس ەلدەرگە قاتىستى قحر-دىڭ سىرتقى ساياساتىنا ارنالعان ورتالىق كەڭەس ءوتتى. ەكى كۇنگە سوزىلعان ماڭىزدى جيىندا قحر توراعاسى، قكپ ورتالىق كوميتەتىنىڭ باس حاتشىسى جانە ورتالىق اسكەري كەڭەستىڭ توراعاسى سي تسزينپين ءسوز سويلەپ، كورشى ەلدەرمەن “ورتاق تاعدىر قاۋىمداستىعىن” قۇرۋ قاجەتتىگىن اتاپ ءوتتى، دەپ حابارلايدى “ادىرنا” ۇلتتىق پورتالى.
سي ءتسزينپيننىڭ ايتۋىنشا، قىتايدىڭ ۇلكەن اۋماعى مەن ۇزىن شەكاراسىنا بايلانىستى كورشى مەملەكەتتەرمەن قارىم-قاتىناس ۇلتتىق قاۋىپسىزدىك پەن دامۋ ءۇشىن ستراتەگيالىق ماڭىزعا يە. ول كورشىلەس وڭىرلەرگە عالامدىق اۋقىمدا قاراۋ، جاۋاپكەرشىلىك پەن تاريحي ميسسيانى سەزىنە وتىرىپ جۇمىس جۇرگىزۋ قاجەت ەكەنىن ايتتى.
قحر باسشىسى قىتايدىڭ كورشىلەس ەلدەرمەن جاڭا داۋىردەگى ساياساتىنىڭ جەتىستىكتەرىن جۇيەلەپ، قازىرگى حالىقارالىق جاعدايعا عىلىمي تالداۋ جاسادى. ول الداعى كەزەڭگە ارنالعان نەگىزگى ماقساتتار مەن ناقتى شارالاردى ايقىنداپ بەردى.
قىتاي 18-سەزدەن بەرى تاتۋ كورشىلىك، شىن پەيىل، ءوزارا تيىمدىلىك جانە اشىقتىق قاعيداتتارىن ۇستانىپ كەلەدى. بۇل قاعيداتتار “ورتاق تاعدىر قاۋىمداستىعى” تۇجىرىمداماسىنىڭ نەگىزىن قۇرايدى.
سي تسزينپين قىتايدىڭ كورشىلەس مەملەكەتتەرمەن جان-جاقتى ىنتىماقتاستىقتى تەرەڭدەتىپ، ءتۇرلى سالاداعى الماسۋلاردى كەڭەيتىپ جاتقانىن اتاپ ءوتتى. كوشباسشىلىق دەڭگەيدەگى ديپلوماتيانىڭ ارقاسىندا تاريحي جەتىستىكتەرگە قول جەتكىزىلگەنىن ايتتى.
الايدا قازىرگى كۇردەلى حالىقارالىق جاعداي قىتايدان دامۋ مەن قاۋىپسىزدىك مۇددەلەرىن ۇشتاستىرىپ، ىشكى جانە سىرتقى فاكتورلاردى ۇيلەستىرە وتىرىپ ارەكەت ەتۋدى تالاپ ەتەدى.
قىتاي بولاشاقتا دا تاتۋ، تۇراقتى جانە وركەندەگەن كورشىلىك ساياساتىن ۇستاناتىن بولادى. بۇل ساياسات ازيالىق قۇندىلىقتارعا — بەيبىتشىلىك، ىنتىماقتاستىق، اشىقتىق جانە ءوزارا قۇرمەتكە نەگىزدەلمەك.
«ءبىر بەلدەۋ — ءبىر جول» باستاماسى باستى ىنتىماقتاستىق الاڭى رەتىندە قالا بەرەدى. قىتاي ستراتەگيالىق سەنىمدى ارتتىرىپ، كورشى ەلدەردىڭ دامۋ جولىن ءوز ەركىمەن تاڭداۋعا قۇرمەتپەن قارايتىنىن جەتكىزدى.
گۋمانيتارلىق بايلانىستاردى، شەكارالىق قاتىناستاردى جەڭىلدەتۋ جانە حالىقتار اراسىنداعى تىكەلەي بايلانىستاردى نىعايتۋ دا نەگىزگى باعىتتار قاتارىندا بولماق.
كەڭەسكە قكپ ساياسي بيۋروسىنىڭ تۇراقتى كوميتەت مۇشەلەرى – لي تسيان، چجاو لەتسزي، ۆان حۋنين، تساي تسي، دين سيۋەسيان، لي سي جانە قحر توراعاسىنىڭ ورىنباسارى حان چجەن قاتىستى. جيىنعا قحر مەملەكەتتىك كەڭەسىنىڭ پرەمەرى لي تسيان توراعالىق ەتتى. ول سي ءتسزينپيننىڭ ءسوزىن تەرەڭ ءتۇسىنىپ، بارلىق تاپسىرمالاردى مۇقيات ورىنداۋ قاجەت ەكەنىن ەرەكشە اتاپ ءوتتى.
