“ۇسىنىس ارزان بولدى”. قازاقستاندا ەكىنشى اەس-ءتى قىتاي سالادى

قازاقستانداعى ەكىنشى اتوم ەلەكتر ستانتسياسىن سالۋ جونىندەگى كونسورتسيۋمدى قىتاي ۇلتتىق يادرولىق كورپوراتسياسى (CNNC) باسقاراتىن بولدى، دەپ حابارلايدى “ادىرنا” ۇلتتىق پورتالى. اتوم ەنەرگياسى جونىندەگى اگەنتتىك توراعاسى الماسادام ساتقاليەۆتىڭ مالىمدەۋىنشە، الدىن الا ىرىكتەۋگە قاتىسقان بارلىق شەتەلدىك كومپانيالار وزدەرىنە ءتان بىرەگەي تەحنولوگيالاردى ۇسىنعان. الايدا ەڭ ءتيىمدى ۇسىنىستار قىتاي مەن رەسەي تاراپىنان كەلىپ تۇسكەن. “قىتايمەن يادرولىق سالاداعى ىنتىماقتاستىق تۋرالى جەكە كەلىسىمگە قول قويۋ جوسپارلانىپ وتىر. ءبىز ەلىمىزدە تاعى ءبىر اەس سالۋ ءۇشىن قىتايدىڭ زاماناۋي تەحنولوگيالارىن پايدالانعىمىز كەلەدى. قىتاي – يادرولىق وتىن تسيكلىن تولىق مەڭگەرگەن، قاجەتتى ونەركاسىپتىك بازاسى بار ساناۋلى ەلدەردىڭ ءبىرى”، – دەدى ساتقاليەۆ. ونىڭ ايتۋىنشا، قىتايدىڭ اەس سالۋ بويىنشا ۇسىنىسى رەسەيگە قاراعاندا ەكى ەسە ارزان بولعان. سونىمەن قاتار، ساتقاليەۆ كەلىسسوزدەردىڭ جوعارى دەڭگەيدە وتكەنىن جانە قىتايدىڭ قۇرىلىستى تەز ءارى ساپالى جۇرگىزە الاتىن تاجىريبەسى بار ەكەنىن اتاپ ءوتتى. ء“بىز بۇل باعىتتا جۇمىستى باستاپ كەتتىك. اگەنتتىك تە ءتيىمدى كونسورتسيۋمدار قۇرۋى كەرەك”، – دەدى ول. ەسكە سالايىق، بۇعان دەيىن قازاقستانداعى ءبىرىنشى اەس قۇرىلىسىن رەسەيلىك “روساتوم” جۇزەگە اسىراتىنى بەلگىلى بولعان ەدى.