الماتى سوتى اۋەجايداعى كەپىلگە الۋ ءىسىن جالپى تارتىپپەن تەرگەۋ ءۇشىن پروكۋرورعا قايتاردى. بۇل شەشىم كۇدىكتىنىڭ كىناسىن مويىنداماعانى جانە قىلمىستىق ءىس جۇرگىزۋ زاڭناماسىنىڭ ەلەۋلى بۇزىلۋىنا بايلانىستى قابىلداندى، دەپ حابارلايدى "ادىرنا" ۇلتتىق پورتالى.
كۇدىكتىگە قىلمىستىق كودەكستىڭ 293-بابى (بۇزاقىلىق), 261-بابى (كەپىلگە الۋ), 273-بابى (تەرروريزم اكتىسى تۋرالى كورىنەۋ جالعان حابارلاۋ) بويىنشا ايىپ تاعىلعان.
سوت بارىسىندا انىقتالعانداي، 2024 جىلدىڭ 7 ناۋرىزىندا كۇدىكتى الماتى حالىقارالىق اۋەجايىنىڭ جولاۋشىلاردى تىركەۋ زالىنا كىرىپ، ودان ءارى تەكسەرۋ ايماعىنا وتپەك بولعان. وسى ساتتە ول كۇزەت ينسپەكتورى م.-نى شاشىنان تارتىپ، پىشاقپەن قورقىتىپ، جولىن بوگەمەۋدى تالاپ ەتكەن. كەپىلگە الىنعان اداممەن بىرگە ۇشۋ ايماعىنا قاراي بەت العان.
پوليتسيا قىزمەتكەرلەرىنە دە قاۋىپ ءتوندىرىپ، قارۋلارىن تاستاۋدى بۇيىرىپ، جاقىنداعان جاعدايدا كەپىلدى پىشاقتايتىنىن جانە اۋەجايدى جارىپ جىبەرەتىنىن ايتقان.
كۇدىكتى قك-ءنىڭ 261-بابى بويىنشا تاعىلعان ايىپتى مويىنداماي، ەشكىمدى كەپىلگە الماعانىن، تەك كۇتۋ زالىنا وتپەك بولعانىن مالىمدەدى.
سوت جەدەلدەتىلگەن تەرگەۋدى توقتاتىپ، ءىستى جالپى تارتىپپەن قاراۋ قاجەت دەگەن شەشىمگە كەلدى. بۇل – قىلمىستىق-پروتسەستىك كودەكستىڭ 190-بابى 6-بولىگى، 4-تارماعىنا جانە 323-بابىنا سايكەس قابىلدانعان زاڭدى شەشىم.
ايتا كەتەيىك، وقيعا كەزىندە ەر ادام ءبىر قىزدى كەپىلگە الىپ، پىشاقپەن قورقىتقان. الايدا جاعدايدى ۋشىقتىرماۋ ءۇشىن اۋەجاي قىزمەتكەرى مۇسا ءابدىرايىموۆ ءوزىن كەپىلگە ۇسىنعان. ول كەيىنىرەك كۇدىكتىنىڭ قولىنداعى پىشاقتى جۇلىپ الىپ، قاۋىپتىڭ الدىن العان. سوتتا مۇسا ءابدىرايىموۆ جابىرلەنۋشى رەتىندە جاۋاپ بەرۋدەن باس تارتتى.
بۇعان دەيىن بۇل وقيعاعا بايلانىستى ءۇش قىلمىستىق ءىس قوزعالعان بولاتىن.
