Almaty soty äuejaidaǧy kepılge alu ısın jalpy tärtıppen tergeu üşın prokurorǧa qaitardy. Būl şeşım küdıktınıŋ kınäsın moiyndamaǧany jäne qylmystyq ıs jürgızu zaŋnamasynyŋ eleulı būzyluyna bailanysty qabyldandy, dep habarlaidy "Adyrna" ūlttyq portaly.
Küdıktıge Qylmystyq kodekstıŋ 293-baby (Būzaqylyq), 261-baby (Kepılge alu), 273-baby (Terrorizm aktısı turaly körıneu jalǧan habarlau) boiynşa aiyp taǧylǧan.
Sot barysynda anyqtalǧandai, 2024 jyldyŋ 7 nauryzynda küdıktı Almaty halyqaralyq äuejaiynyŋ jolauşylardy tırkeu zalyna kırıp, odan ärı tekseru aimaǧyna ötpek bolǧan. Osy sätte ol küzet inspektory M.-ny şaşynan tartyp, pyşaqpen qorqytyp, jolyn bögemeudı talap etken. Kepılge alynǧan adammen bırge ūşu aimaǧyna qarai bet alǧan.
Polisiia qyzmetkerlerıne de qauıp töndırıp, qarularyn tastaudy būiyryp, jaqyndaǧan jaǧdaida kepıldı pyşaqtaitynyn jäne äuejaidy jaryp jıberetının aitqan.
Küdıktı QK-nıŋ 261-baby boiynşa taǧylǧan aiypty moiyndamai, eşkımdı kepılge almaǧanyn, tek kütu zalyna ötpek bolǧanyn mälımdedı.
Sot jedeldetılgen tergeudı toqtatyp, ıstı jalpy tärtıppen qarau qajet degen şeşımge keldı. Būl – Qylmystyq-prosestık kodekstıŋ 190-baby 6-bölıgı, 4-tarmaǧyna jäne 323-babyna säikes qabyldanǧan zaŋdy şeşım.
Aita keteiık, oqiǧa kezınde er adam bır qyzdy kepılge alyp, pyşaqpen qorqytqan. Alaida jaǧdaidy uşyqtyrmau üşın äuejai qyzmetkerı Mūsa Äbdıraiymov özın kepılge ūsynǧan. Ol keiınırek küdıktınıŋ qolyndaǧy pyşaqty jūlyp alyp, qauıptıŋ aldyn alǧan. Sotta Mūsa Äbdıraiymov jäbırlenuşı retınde jauap beruden bas tartty.
Būǧan deiın būl oqiǧaǧa bailanysty üş qylmystyq ıs qozǧalǧan bolatyn.
