ءماجىلىس دەپۋتاتى ەرمۇرات باپي نۇرلان نىعماتۋلليننىڭ ۇلى نۇرجان نۇرلانوۆتىڭ رەيدەرلىك ءىس بويىنشا كۇدىكتى دەپ تانىلماعانىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
باپي بۇل ماسەلەنىڭ ءتيىستى ورگانداردىڭ كىناسى ەكەنىن اتاپ ءوتتى.
«ەگەر نۇرلانوۆتىڭ رەيدەرلىكپەن اينالىسقانى دالەلدەنبەسە، بۇل - ءبىزدىڭ ءتيىستى ورگانداردىڭ كىناسى. ەگەر ءبىر ازامات ناقتى شاعىمدانعان بولسا، ول جايدان-جاي ەمەس شىعار؟ نەگە ول نۇرلان نىعماتۋليننىڭ ۇلىنىڭ ۇستىنەن شاعىمداندى؟ بۇل جەردە ءبىر نارسە بار. سوندىقتان، بيزنەسىن جوعالتقان ازامات ارىز بەرىپ، شاعىم جاساۋعا مۇمكىندىگى بار»، - دەدى ەرمۇرات باپي ماجىلىستە.
نۇرجان نۇرلانوۆ 2022 جىلعى قاڭتار وقيعالارىنا دەيىن «قازمۇنايگاز-اەرو» جشس-نىڭ باس ديرەكتورى بولىپ قىزمەت اتقارعان. سونىمەن قاتار، ول «بايتەرەك» ۇلتتىق باسقارۋشى حولدينگى باسقارماسىنىڭ مۇشەسى بولعان. نۇرلان نىعماتۋللين 2022 جىلى ءماجىلىس سپيكەرىنىڭ قىزمەتىنەن كەتتى. ول 2016 جىلدان باستاپ تومەنگى پالاتانى باسقاردى، بۇل ونىڭ ەكىنشى مەرزىمى بولدى.
بۇعان دەيىن نىعماتۋلليندەر وتباسىنىڭ اتىنا رەيدەرلىك شابۋىلدار مەن قىلمىستىق سحەمالارعا قاتىسى بار دەگەن ايىپتاۋلار بىرنەشە رەت ايتىلعان بولاتىن. 2023 جىلدىڭ ناۋرىز ايىندا ەرلان نىعماتۋللينگە قاتىستى رەيدەرلىك ايىپتاۋمەن شاعىمدانعان ناتاليا وۆدەيچۋك پەن راميس يبراگيموۆتىڭ ارىزى بويىنشا قىلمىستىق ءىس قوزعالعانى حابارلاندى.
