الماتىدا "مەركۋر تاۋن" تۇرعىن ءۇي كەشەنىنىڭ كۇزەتشىسىن قاتىگەزدىكپەن ءولتىرۋ ءىسى بويىنشا سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
سوت كۇدىكتىنى كىنالى دەپ تانىپ، ونى 22 جىلعا باس بوستاندىعىنان ايىردى.
"قىلمىستىق كودەكستىڭ 99-بابى 2-بولىگى 5-تارماعى جانە 147-بابى 5-بولىگى بويىنشا قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىپ، 99-باپتىڭ 2-بولىگى 5-تارماعى بويىنشا 19 جىل، 147-باپتىڭ 5-بولىگى بويىنشا 4 جىل باس بوستاندىعىنان ايىرۋ جازاسى تاعايىندالسىن. قىلمىستىق قۇقىقبۇزۋشىلىقتاردىڭ جيىنتىعى بويىنشا جازالاردى ءىشىنارا قوسۋ ارقىلى تۇپكىلىكتى 22 جىل باس بوستاندىعىنان ايىرۋ جازاسى بەلگىلەنسىن", – دەپ وقىدى ۇكىمدى سۋديا.
سونداي-اق، سوت ايىپتالۋشىدان جابىرلەنۋشىلەر پايداسىنا 24 ميلليون تەڭگە جانە وكىلدىك قىزمەتتەرگە جۇمسالعان 1 150 000 تەڭگە ءوندىرۋدى بۇيىردى.
ايتا كەتەيىك، الماتى قالاسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىنداعى قورىتىندى تىڭداۋلار بىرنەشە رەت كەيىنگە شەگەرىلگەن. العاشىندا ولار 19 ناۋرىزدا ءوتۋى ءتيىس بولعان، بىراق كەيىن 27 ناۋرىزعا، ودان سوڭ 2 ساۋىرگە، ەڭ سوڭىندا 9 ساۋىرگە اۋىستىرىلعان. اۋىستىرۋ سەبەپتەرى جاريا ەتىلمەدى.
ەسكە سالايىق، كۇزەتشىنى تۇرعىننىڭ بىرنەشە رەت جول تالعامايتىن كولىكپەن باسىپ كەتكەنى، كەيىن ونىڭ باسىنا سەكىرگەنى تۇسىرىلگەن بەينەجازبا جەلىگە تاراعان بولاتىن. كۇزەتشى اۋىر جاعدايدا اۋرۋحاناعا جەتكىزىلگەنىمەن، سول جەردە كوز جۇمعان.قاتىگەز ارەكەتتىڭ سەبەبى – كۇزەتشىنىڭ تۇرعىننىڭ اتا-اناسىنىڭ ءوتىنىشى بويىنشا اشۋلى ەر ادامدى كەشەن اۋلاسىنان شىعارماي قويۋى بولعان. قايعىلى وقيعادان كەيىن تۇرعىندار 45 جاستاعى بۇل ەر ادامنىڭ بىرنەشە جىلدان بەرى اتا-اناسىمەن بىرگە سول تۇرعىن ءۇي كەشەنىندە تۇراتىنىن، ەسىرتكىگە تاۋەلدى ەكەنىن جانە كورشىلەردى ۇنەمى قورقىتىپ كەلگەنىن ايتقان.
