Almatyda "Merkýr Taýn" turǵyn úı kesheniniń kúzetshisin qatygezdikpen óltirý isi boıynsha sot úkimi shyqty, dep habarlaıdy "Adyrna" ulttyq portaly.
Sot kúdiktini kináli dep tanyp, ony 22 jylǵa bas bostandyǵynan aıyrdy.
"Qylmystyq kodekstiń 99-baby 2-bóligi 5-tarmaǵy jáne 147-baby 5-bóligi boıynsha qylmystyq quqyqbuzýshylyq jasaǵany úshin kináli dep tanyp, 99-baptyń 2-bóligi 5-tarmaǵy boıynsha 19 jyl, 147-baptyń 5-bóligi boıynsha 4 jyl bas bostandyǵynan aıyrý jazasy taǵaıyndalsyn. Qylmystyq quqyqbuzýshylyqtardyń jıyntyǵy boıynsha jazalardy ishinara qosý arqyly túpkilikti 22 jyl bas bostandyǵynan aıyrý jazasy belgilensin", – dep oqydy úkimdi sýdıa.
Sondaı-aq, sot aıyptalýshydan jábirlenýshiler paıdasyna 24 mıllıon teńge jáne ókildik qyzmetterge jumsalǵan 1 150 000 teńge óndirýdi buıyrdy.
Aıta keteıik, Almaty qalasynyń mamandandyrylǵan aýdanaralyq qylmystyq ister jónindegi sotyndaǵy qorytyndy tyńdaýlar birneshe ret keıinge shegerilgen. Alǵashynda olar 19 naýryzda ótýi tıis bolǵan, biraq keıin 27 naýryzǵa, odan soń 2 sáýirge, eń sońynda 9 sáýirge aýystyrylǵan. Aýystyrý sebepteri jarııa etilmedi.
Eske salaıyq, kúzetshini turǵynnyń birneshe ret jol talǵamaıtyn kólikpen basyp ketkeni, keıin onyń basyna sekirgeni túsirilgen beınejazba jelige taraǵan bolatyn. Kúzetshi aýyr jaǵdaıda aýrýhanaǵa jetkizilgenimen, sol jerde kóz jumǵan.Qatygez árekettiń sebebi – kúzetshiniń turǵynnyń ata-anasynyń ótinishi boıynsha ashýly er adamdy keshen aýlasynan shyǵarmaı qoıýy bolǵan. Qaıǵyly oqıǵadan keıin turǵyndar 45 jastaǵy bul er adamnyń birneshe jyldan beri ata-anasymen birge sol turǵyn úı kesheninde turatynyn, esirtkige táýeldi ekenin jáne kórshilerdi únemi qorqytyp kelgenin aıtqan.
