قاراعاندى وبلىسى اكىمدىگىمەن قانداستاردىڭ باسىم كوپشىلىگى قونىستانعان وڭىرلەردەگى جاعدايدى تۇراقتاندىرۋ ماقساتىندا قاراعاندى، تەمىرتاۋ، اباي قالالارىندا، بۇقار–جىراۋ، وساكاروۆ اۋداندارىندا قوعامدىق-ساياسي جانە ەتنوسارالىق احۋالدى ساۋىقتىرۋ، قانداستاردى الەۋمەتتەندىرۋ مەن بەيىمدەۋگە باعىتتالعان 2025-2026 جىلدارعا ارنالعان جول كارتاسى بەكىتىلدى.
بۇل جول كارتاسى ەتنيكالىق قازاقتاردىڭ جاڭا ورتاعا جىلدام بەيىمدەلۋىنە، ەكونوميكالىق جانە الەۋمەتتىك مۇمكىندىكتەرگە تەڭ قولجەتىمدىلىكتى قامتاماسىز ەتۋگە باعىتتالعان. وسىعان وراي، قانداس مارتەبەسىن بەرۋگە ءوتىنىش بەرگەن ەتنيكالىق قازاقتارمەن جۇمىسقا ورنالاسۋعا، ءبىلىم الۋعا، دەنساۋلىق ساقتاۋعا، قازاقستان ازاماتتىعىن راسىمدەۋگە بايلانىستى اقپاراتتىق-ءتۇسىندىرۋ جۇمىستارى جۇرگىزىلۋدە.
قانداستاردىڭ كەلۋ سەبەپتەرى مەن ورنالاسۋى
ەتنيكالىق قازاقتاردىڭ نەگىزگى بولىگى قاراعاندى وبلىسىنا «وتباسىمەن بىرىگۋ» ماقساتى بويىنشا كوشىپ كەلەدى. ستاتيستيكالىق دەرەكتەرگە سۇيەنسەك، قانداستاردىڭ شامامەن 85%-ى وسى ماقساتتا ەلگە ورالادى. ولاردىڭ جاڭا ومىرگە بەيىمدەلۋىنە كومەكتەسۋ ءۇشىن ارنايى قىزمەتتەر كورسەتىلىپ، مەملەكەتتىك باعدارلامالارعا قاتىسۋ مۇمكىندىكتەرى قاراستىرىلۋدا.
«FSM Social» ءموبيلدى قوسىمشاسى – قانداستارعا ارنالعان كومەكشى قۇرال
قانداستار مەن ولاردىڭ وتباسى مۇشەلەرىنە بەيىمدەۋ جانە ينتەگراتسيالىق قىزمەتتەردى ءتيىمدى كورسەتۋ ماقساتىندا «FSM Social» ءموبيلدى قوسىمشاسى ىسكە قوسىلعان. بۇل قوسىمشا قانداستارعا مەملەكەتتىك قىزمەتتەرگە قول جەتكىزۋدى جەڭىلدەتىپ، الەۋمەتتىك ينفراقۇرىلىممەن بايلانىستى جاقسارتۋعا كومەكتەسەدى.
«FSM Social» قوسىمشاسى ارقىلى قانداستارعا كەلەسى قىزمەتتەر ۇسىنىلادى:
• ەلەكتروندى تسيفرلىق قولتاڭبا (ەتسق) الۋ;
• جۇمىسقا ورنالاسۋ;
• مەكتەپكە دەيىنگى جانە جالپى ورتا ءبىلىم بەرۋ ۇيىمدارىنا تىركەلۋ;
• مەديتسينالىق ۇيىمدارعا تىركەلۋ;
• جەر ۋچاسكەسىن الۋ;
• وتباسىنىڭ تسيفرلىق كارتاسىندا قانداستاردى جانە ولاردىڭ وتباسىن تىركەۋ.
قانداستاردى جۇمىسپەن قامتۋ شارالارى
قانداس مارتەبەسىن العان ەتنيكالىق قازاقتار «قانداس» اقپاراتتىق-اناليتيكالىق جۇيەسىنەن (ااج) «FSM Social» ءموبيلدى قوسىمشاسىنا اۆتوماتتى تۇردە اۋىستىرىلادى. بۇدان ءارى ولار ەڭبەك موبيلدىلىگى ورتالىعىنىڭ ماماندارى ارقىلى جۇمىس ىزدەۋگە مۇمكىندىك الادى. ماماندار قانداستاردى ايماقتىق جۇمىسپەن قامتۋ ورتالىقتارىنا باعىتتاپ، ولار ءۇشىن قولجەتىمدى بوس جۇمىس ورىندارى جونىندە اقپارات بەرەدى.
ءبىلىم بەرۋ مەن مەديتسينالىق قىزمەتتەرگە قولجەتىمدىلىك
قانداستار مەن ولاردىڭ وتباسى مۇشەلەرىن تەزىرەك الەۋمەتتەندىرۋ ءۇشىن ءبىلىم بەرۋ جانە مەديتسينالىق قىزمەتتەردى الۋ ۇدەرىسى جەڭىلدەتىلگەن. بالالاردى مەكتەپكە دەيىنگى جانە ورتا ءبىلىم بەرۋ مەكەمەلەرىنە ورنالاستىرۋدا كۆوتالار قاراستىرىلىپ، ولارعا بەيىمدەۋ كۋرستارى ۇيىمداستىرىلادى. سونىمەن قاتار، قانداستار العاشقى مەديتسينالىق كومەك الۋ ءۇشىن تىركەۋ ۇدەرىسىن وڭاي جۇرگىزە الادى.
جول كارتاسىنىڭ ماڭىزى
2025-2026 جىلدارعا ارنالعان جول كارتاسى قانداستاردىڭ قاراعاندى وبلىسىنا بەيىمدەلۋىن جەڭىلدەتىپ، ولاردىڭ جاڭا ورتاعا ءساتتى ينتەگراتسيالانۋىنا سەپتىگىن تيگىزەدى. بۇل باستاما وڭىردەگى ەتنوسارالىق تۇراقتىلىقتى نىعايتۋعا، قانداستاردىڭ ءومىر ءسۇرۋ ساپاسىن ارتتىرۋعا جانە ەكونوميكالىق الەۋەتىن دامىتۋعا باعىتتالعان.
قانداستاردىڭ ەلگە ورالۋى – قازاقستاننىڭ دەموگرافيالىق جانە الەۋمەتتىك دامۋىنا ىقپال ەتەتىن ماڭىزدى قادام. سوندىقتان مەملەكەتتىك ورگاندار تاراپىنان كورسەتىلەتىن قولداۋ شارالارى ولاردىڭ جاڭا ومىرگە تەز بەيىمدەلۋىنە جانە ءوز الەۋەتىن جۇزەگە اسىرۋىنا مۇمكىندىك بەرەدى.
