ەكىباستۇز قالاسى توتەنشە جاعدايلار باسقارماسىنىڭ قىزمەتكەرلەرى پارا العانى ءۇشىن سوتتالدى. بۇل تۋرالى بۇگىن، 7 ساۋىردە سىبايلاس جەمقورلىققا قارسى ءىس-قيمىل اگەنتتىگى ايتتى، دەپ حابارلايدى «ادىرنا» ءتىلشىسى.
«31 ناۋرىزدا پاۆلودار وبلىسىندا ەكىباستۇز قالالىق سوتى ەكىباستۇز قالاسى توتەنشە جاعدايلار باسقارماسىنىڭ باستىعى د.كۋكونەۆكە، ونىڭ ورىنباسارى ج.مايمانوۆقا جانە كاسىپكەر ب.جۇماشەۆكە ۇكىم شىعاردى. كۋكونەۆ پەن مايمانوۆ جۇماشەۆتەن ونىڭ كاسىپورنىنا قاتىستى مەملەكەتتىك ەمەس ورتكە قارسى قىزمەت كورسەتۋ شارتتارىن جاساسقانى ءۇشىن جالپى سوماسى 7,4 ملن تەڭگەگە بىرنەشە رەت پارا العانى ءۇشىن كىنالى دەپ تانىلدى»،—دەلىنگەن حابارلامادا.
سوت ۇكىمىمەن كۋكونەۆ 7 جىل 6 ايعا، مايمانوۆ پەن جۇماشەۆ 7 جىلعا باس بوستاندىعىنان ايىرىلدى. سونداي-اق ولار ءومىر بويى مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ايىرىلدى. سونىمەن قاتار، كۋكونەۆ ازاماتتىق قورعانىس پولكوۆنيگى، مايمانوۆ ازاماتتىق قورعانىس مايورى ارنايى اتاعىنان ايىرىلدى.
سوت اكتىسى زاڭدى كۇشىنە ەنگەن جوق.
