Ekıbastūz qalasy Tötenşe jaǧdailar basqarmasynyŋ qyzmetkerlerı para alǧany üşın sottaldy. Būl turaly bügın, 7 säuırde Sybailas jemqorlyqqa qarsy ıs-qimyl agenttıgı aitty, dep habarlaidy «Adyrna» tılşısı.
«31 nauryzda Pavlodar oblysynda Ekıbastūz qalalyq soty Ekıbastūz qalasy Tötenşe jaǧdailar basqarmasynyŋ bastyǧy D.Kukonevke, onyŋ orynbasary J.Maimanovqa jäne käsıpker B.Jūmaşevke ükım şyǧardy. Kukonev pen Maimanov Jūmaşevten onyŋ käsıpornyna qatysty memlekettık emes örtke qarsy qyzmet körsetu şarttaryn jasasqany üşın jalpy somasy 7,4 mln teŋgege bırneşe ret para alǧany üşın kınälı dep tanyldy»,—delıngen habarlamada.
Sot ükımımen Kukonev 7 jyl 6 aiǧa, Maimanov pen Jūmaşev 7 jylǧa bas bostandyǧynan aiyryldy. Sondai-aq olar ömır boiy memlekettık qyzmette jäne kvazimemlekettık sektorda qyzmet atqaru qūqyǧynan aiyryldy. Sonymen qatar, Kukonev azamattyq qorǧanys polkovnigı, Maimanov azamattyq qorǧanys maiory arnaiy ataǧynan aiyryldy.
Sot aktısı zaŋdy küşıne engen joq.
