قازاقستاندا موپەد جۇرگىزۋشىلەرى ءۇشىن جاڭا ەرەجەلەر رەسمي تۇردە كۇشىنە ەندى، دەپ حابارلايدى “ادىرنا” ۇلتتىق پورتالى.
پرەزيدەنت قاسىم-جومارت توقاەۆ قول قويعان «جول ءجۇرىسى تۋرالى» زاڭعا ەنگىزىلگەن وزگەرىستەردەن كەيىن موپەد يەلەرى ەندى كولىك جۇرگىزۋشىلەرىمەن تەڭ دارەجەدە جاۋاپكەرشىلىك ارقالايدى. ينتەرنەت قولدانۋشىلارى بۇل كۇندى “موپەد جۇرگىزۋشىلەرىنىڭ تەررور ءداۋىرىنىڭ سوڭى” دەپ اتاپ جاتىر.
ەندى موپەد جۇرگىزۋشىلەرى تالاپتاردى ورىنداۋعا مىندەتتى.
موپەد مىندەتتى تۇردە تىركەلگەن بولۋى كەرەك، جۇرگىزۋشى كۋالىگى بولۋى قاجەت، ساقتاندىرۋ ءپوليسى بولۋى شارت، تەحنيكالىق بايقاۋدان ءوتۋى ءتيىس، قورعانىس دۋلىعاسىن (شلەم) كيۋ مىندەتتى. موپەدتىڭ تەحنيكالىق جاعدايى جارامدى بولۋى قاجەت.
جول ەرەجەسىن بۇزعان جاعدايدا موپەد يەلەرىنە جازا قولدانىلادى. ماس كۇيىندە كولىك جۇرگىزۋ — 15 تاۋلىككە قاماق جانە 7 جىلعا جۇرگىزۋشى كۋالىگىنەن ايىرۋ، جۇرگىزۋشى كۋالىگى جوق نەمەسە قۇقىعىنان ايىرىلعان ادامنىڭ موپەد ايداۋى، جىلدامدىقتى ارتتىرۋ، قاۋىپتى مانەۆر جاساۋ، قارسى جولاققا شىعۋ، قىزىل شامعا ءوتۋ، جاياۋ جۇرگىنشىگە جول بەرمەۋ، جول بەلگىلەرى مەن سىزىقتارىن بۇزۋ، رۇقسات ەتىلمەگەن جارىق نەمەسە دىبىستىق سيگنال قولدانۋ جانە اپاتتىق جاعداي تۋدىرعاندا ايىپپۇل سالىنادى.
ءىىم مالىمەتىنشە، بۇدان بىلاي زاڭبۇزۋشىلىقتار اۆتوماتتى تىركەۋ كامەرالارى ارقىلى جازىلادى.
ستاتيستيكاعا سۇيەنسەك، 2024 جىلدىڭ ون ەكى ايىندا رەسپۋبليكا اۋماعىندا موپەدتەردىڭ قاتىسۋىمەن 1 819 جول-كولىك وقيعاسى تىركەلىپ، 76 ادام قازا تاۋىپ، 1 945 ادام جاراقات العان. ال بيىلعى جىلدىڭ العاشقى ءۇش ايىندا 103 اپات بولىپ، 2 ءجاسوسپىرىم قازا تاپقان، 105 ادام جارالانعان.
“بۇعان دەيىن موپەد جۇرگىزۋشىلەرى جول ەرەجەسىن بۇزعانى ءۇشىن 2 اەك كولەمىندە ايىپپۇل تولەيتىن. ەندى 2025 جىلدىڭ 5 ساۋىرىنەن باستاپ ولار مەحانيكالىق كولىك جۇرگىزۋشىلەرىمەن تەڭ جاۋاپكەرشىلىككە يە”، – دەدى ءىىم وكىلى.
