Qazaqstanda moped jürgızuşılerı üşın jaŋa erejeler resmi türde küşıne endı, dep habarlaidy “Adyrna” ūlttyq portaly.
Prezident Qasym-Jomart Toqaev qol qoiǧan «Jol jürısı turaly» zaŋǧa engızılgen özgerısterden keiın moped ielerı endı kölık jürgızuşılerımen teŋ därejede jauapkerşılık arqalaidy. İnternet qoldanuşylary būl kündı “moped jürgızuşılerınıŋ terror däuırınıŋ soŋy” dep atap jatyr.
Endı moped jürgızuşılerı talaptardy oryndauǧa mındettı.
Moped mındettı türde tırkelgen boluy kerek, jürgızuşı kuälıgı boluy qajet, saqtandyru polisı boluy şart, tehnikalyq baiqaudan ötuı tiıs, qorǧanys dulyǧasyn (şlem) kiiu mındettı. Mopedtıŋ tehnikalyq jaǧdaiy jaramdy boluy qajet.
Jol erejesın būzǧan jaǧdaida moped ielerıne jaza qoldanylady. Mas küiınde kölık jürgızu — 15 täulıkke qamaq jäne 7 jylǧa jürgızuşı kuälıgınen aiyru, jürgızuşı kuälıgı joq nemese qūqyǧynan aiyrylǧan adamnyŋ moped aidauy, jyldamdyqty arttyru, qauıptı manevr jasau, qarsy jolaqqa şyǧu, qyzyl şamǧa ötu, jaiau jürgınşıge jol bermeu, jol belgılerı men syzyqtaryn būzu, rūqsat etılmegen jaryq nemese dybystyq signal qoldanu jäne apattyq jaǧdai tudyrǧanda aiyppūl salynady.
IIM mälımetınşe, būdan bylai zaŋbūzuşylyqtar avtomatty tırkeu kameralary arqyly jazylady.
Statistikaǧa süiensek, 2024 jyldyŋ on ekı aiynda respublika aumaǧynda mopedterdıŋ qatysuymen 1 819 jol-kölık oqiǧasy tırkelıp, 76 adam qaza tauyp, 1 945 adam jaraqat alǧan. Al biylǧy jyldyŋ alǧaşqy üş aiynda 103 apat bolyp, 2 jasöspırım qaza tapqan, 105 adam jaralanǧan.
“Būǧan deiın moped jürgızuşılerı jol erejesın būzǧany üşın 2 AEK kölemınde aiyppūl töleitın. Endı 2025 jyldyŋ 5 säuırınen bastap olar mehanikalyq kölık jürgızuşılerımen teŋ jauapkerşılıkke ie”, – dedı IIM ökılı.
Ūqsas jaŋalyqtar
