قازاقستان اۋماعىندا سيرەك كەزدەسەتىن مەتالدار وندىرۋگە مۇمكىندىك بەرەتىن جاڭا ايماقتار انىقتالدى. الدىن الا ەسەپتەۋلەر بويىنشا، 300 مەتر تەرەڭدىكتەگى سيرەك جەر مەتالدارىنىڭ جالپى قورى 20 ميلليون توننادان اسادى، دەپ حابارلايدى "ادىرنا" ۇلتتىق پورتالى قر ونەركاسىپ جانە قۇرىلىس مينيسترلىگىنە سىلتەپ.
قازىرگى ۋاقىتتا سيرەك كەزدەسەتىن مەتالل ءوندىرىسىن دامىتۋ ماقساتىندا 12 ۋچاسكەدە مەملەكەتتىك گەولوگيالىق زەرتتەۋ جۇمىستارى جۇرگىزىلىپ جاتىر. مينيسترلىكتىڭ حابارلاۋىنشا، بۇل باعىتتا Cove Capital جانە HMS Bergbau سياقتى شەتەلدىك جەكە كومپانيالار دا بارلاۋ جۇمىستارىن قولعا الادى.
"سيرەك كەزدەسەتىن مەتالدار سالاسىن دامىتۋ ءۇشىن 12 ۋچاسكەدە زەرتتەۋ جۇرگىزىلىپ جاتىر. ونىڭ ىشىندە كۇيرەكتىكول ۋچاسكەسى ەرەكشە ماڭىزعا يە. بۇل ايماقتا لانتانيدتەردى قوسا العاندا، شامامەن 800 مىڭ توننا سيرەك كەزدەسەتىن مەتالدار قورى بار. الداعى ۋاقىتتا بۇل كولەمدى ەكى ەسە ارتتىرۋ مۇمكىندىگى بار", – دەدى مينيستر قانات شارلاپاەۆ.
ءمينيستردىڭ ايتۋىنشا، قازاقستان سيرەك جەر مەتالدارىنىڭ قورى بويىنشا قىتاي مەن برازيليادان كەيىنگى ورىنعا جايعاسۋى مۇمكىن. بۇل جاڭالىق الەمدىك باق نازارىنان تىس قالمادى. Reuters اگەنتتىگىنىڭ حابارلاۋىنشا، قازىرگى ۋاقىتتا قازاقستان اقش گەولوگيالىق قىزمەتى جاساعان سيرەك جەر مەتالدارى بار ەلدەر تىزىمىنە كىرمەيدى. بىراق ەگەر مينيسترلىكتىڭ مالىمدەمەسى راستالسا، بۇل جاعداي وزگەرۋى مۇمكىن.
