Qazaqstan aýmaǵynda sırek kezdesetin metaldar óndirýge múmkindik beretin jańa aımaqtar anyqtaldy. Aldyn ala esepteýler boıynsha, 300 metr tereńdiktegi sırek jer metaldarynyń jalpy qory 20 mıllıon tonnadan asady, dep habarlaıdy "Adyrna" ulttyq portaly QR Ónerkásip jáne qurylys mınıstrligine siltep.
Qazirgi ýaqytta sırek kezdesetin metall óndirisin damytý maqsatynda 12 ýchaskede memlekettik geologııalyq zertteý jumystary júrgizilip jatyr. Mınıstrliktiń habarlaýynsha, bul baǵytta Cove Capital jáne HMS Bergbau sııaqty sheteldik jeke kompanııalar da barlaý jumystaryn qolǵa alady.
"Sırek kezdesetin metaldar salasyn damytý úshin 12 ýchaskede zertteý júrgizilip jatyr. Onyń ishinde Kúırektikól ýchaskesi erekshe mańyzǵa ıe. Bul aımaqta lantanıdterdi qosa alǵanda, shamamen 800 myń tonna sırek kezdesetin metaldar qory bar. Aldaǵy ýaqytta bul kólemdi eki ese arttyrý múmkindigi bar", – dedi mınıstr Qanat Sharlapaev.
Mınıstrdiń aıtýynsha, Qazaqstan sırek jer metaldarynyń qory boıynsha Qytaı men Brazılııadan keıingi orynǵa jaıǵasýy múmkin. Bul jańalyq álemdik BAQ nazarynan tys qalmady. Reuters agenttiginiń habarlaýynsha, qazirgi ýaqytta Qazaqstan AQSh Geologııalyq qyzmeti jasaǵan sırek jer metaldary bar elder tizimine kirmeıdi. Biraq eger mınıstrliktiń málimdemesi rastalsa, bul jaǵdaı ózgerýi múmkin.
