بيىل قىركۇيەكتەن باستاپ وزبەكستاننىڭ باقىلاۋ-وتكىزۋ پۋنكتتەرىندە كولىكتەرگە ارنالعان «جاسىل» جانە «قىزىل» ءدالىز جۇيەسى ەنگىزىلەدى، دەپ حابارلايدى "ادىرنا" ۇلتتىق پورتالى.
بۇل جۇيە وزبەكستان پرەزيدەنتى شاۆكات ميرزيەيوۆتىڭ قول قويعان جارلىعى نەگىزىندە ىسكە قوسىلادى. جاڭا جۇيە العاشىندا تاشكەنت وبلىسىنداعى «گيشتكۋپريك» («جىبەك جولى» قازاقستانمەن شەكارالاس) جانە «زانگيوتا» («قاپلانبەك») وتكىزۋ پۋنكتىلەرىندە، سونداي-اق قاراقالپاقستانداعى «ءداۋىت-اتا» («تاجەن») وتكىزۋ پۋنكتەرىندە جۇمىس ىستەي باستايدى.
جۇيەنىڭ باستى ماقساتى – قاۋىپسىز تاۋار تيەلگەن كولىكتەردى «جاسىل» ءدالىز ارقىلى جەدەل تەكسەرۋدەن وتكىزۋ. ال «قىزىل» دالىزگە تۇسكەن كولىكتەرگە تولىق كەدەندىك باقىلاۋ جۇرگىزىلەدى. دەگەنمەن، ەگەر «جاسىل» ءدالىز ارقىلى وتەتىن كولىكتە قانداي دا ءبىر كۇدىك تۋىنداسا، وعان قوسىمشا تەكسەرۋ جۇرگىزىلۋى مۇمكىن.
بۇل جوبا ازىرگە پيلوتتىق نەگىزدە ەنگىزىلەدى. ەگەر ول ءتيىمدى ناتيجە كورسەتسە، 2026 جىلدىڭ 1 قىركۇيەگىنەن باستاپ بارلىق شەكارا پۋنكتىلەرىندە جۇزەگە اسىرىلادى.
سونىمەن قاتار، قازاقستان مەن وزبەكستان اراسىندا قوسىمشا ءتورت ساۋدا ءدالىزىن اشۋ جوسپارلانىپ، جۇك تاسىمالى ماسەلەسىن شەشۋ ءۇشىن جەدەل شتاب قۇرىلاتىن بولادى. الداعى ۋاقىتتا قازاق-وزبەك شەكاراسىندا جاڭا كەدەن تەرمينالى دا اشىلادى، ول 6 گەكتار اۋماقتى قامتىپ، زاماناۋي تەكسەرۋ جانە راسىمدەۋ قۇرىلعىلارىمەن جابدىقتالماق.
