Bıyl qyrkúıekten bastap Ózbekstannyń baqylaý-ótkizý pýnktterinde kólikterge arnalǵan «jasyl» jáne «qyzyl» dáliz júıesi engiziledi, dep habarlaıdy "Adyrna" ulttyq portaly.
Bul júıe Ózbekstan prezıdenti Shavkat Mırzıeıovtiń qol qoıǵan jarlyǵy negizinde iske qosylady. Jańa júıe alǵashynda Tashkent oblysyndaǵy «Gıshtkýprık» («Jibek joly» Qazaqstanmen shekaralas) jáne «Zangıota» («Qaplanbek») ótkizý pýnktilerinde, sondaı-aq Qaraqalpaqstandaǵy «Dáýit-ata» («Tájen») ótkizý pýnkterinde jumys isteı bastaıdy.
Júıeniń basty maqsaty – qaýipsiz taýar tıelgen kólikterdi «jasyl» dáliz arqyly jedel tekserýden ótkizý. Al «qyzyl» dálizge túsken kólikterge tolyq kedendik baqylaý júrgiziledi. Degenmen, eger «jasyl» dáliz arqyly ótetin kólikte qandaı da bir kúdik týyndasa, oǵan qosymsha tekserý júrgizilýi múmkin.
Bul joba ázirge pılottyq negizde engiziledi. Eger ol tıimdi nátıje kórsetse, 2026 jyldyń 1 qyrkúıeginen bastap barlyq shekara pýnktilerinde júzege asyrylady.
Sonymen qatar, Qazaqstan men Ózbekstan arasynda qosymsha tórt saýda dálizin ashý josparlanyp, júk tasymaly máselesin sheshý úshin jedel shtab qurylatyn bolady. Aldaǵy ýaqytta qazaq-ózbek shekarasynda jańa keden termınaly da ashylady, ol 6 gektar aýmaqty qamtyp, zamanaýı tekserý jáne rásimdeý qurylǵylarymen jabdyqtalmaq.
