قر باس پروكۋرورى بەرىك اسىلوۆقا دەپۋتات ەرمۇرات باپي قوعامدا رەزونانس تۋدىرعان ماسەلەلەرگە قاتىستى دەپۋتاتتىق ساۋال جولدادى، دەپ حابارلايدى "ادىرنا" ۇلتتىق پورتالى.
دەپۋتاتتىڭ ايتۋىنشا، سوڭعى ۋاقىتتا ۇلتتىق قۇندىلىقتار مەن داستۇرلەرگە شابۋىل جاسايتىن وقيعالار جيىلەپ كەتتى. سونىڭ ىشىندە، اتىراۋدا مەملەكەتتىك رامىزگە قاتىستى زاڭ بۇزۋشىلىق ۇلكەن الاڭداۋشىلىق تۋعىزدى. مۇز ايدىنىندا وتكەن سپورتتىق جارىس كەزىندە ءتورت ايەل قازاقستاننىڭ مەملەكەتتىك تۋىن ۇستاپ تۇرعان سۋرەتى تاراعان. الايدا تۋدىڭ بەتىندە اراب جازۋى مەن قىلىش بەينەلەنگەن بەلگى بولعان.
ەرمۇرات باپي بۇل ارەكەتتى قاراپايىم قۇقىقبۇزۋشىلىق ەمەس، ەلىمىزدىڭ مەملەكەتتىگى مەن ۇلتتىق بىرەگەيلىگىنە قارسى جاسالعان اشىق ارانداتۋ دەپ باعالادى.
"بۇل – ءبىزدىڭ قوعامىمىزعا، مەملەكەتتىگىمىزگە، ۇلتتىق ءداستۇرىمىز بەن بىرەگەيلىگىمىزگە جاسالعان اشىق جانە ناقاق قارسىلىق. مەملەكەتتىك تۋدى قورلاۋ – بۇكىل حالىقتى، تۇتاس مەملەكەتتى قورلاۋ!" – دەدى ول.
سونىمەن قاتار، دەپۋتات Wildberries Russ پلاتفورماسىندا قازاقستان تۋىنىڭ بۇرمالانعان نۇسقاسى ساتىلىمدا تۇرعانىن مالىمدەدى. بۇل جاعدايدىڭ قالاي ورىن العانىن انىقتاۋ جانە جاۋاپتى تۇلعالاردى جازالاۋ قاجەت ەكەنىن اتاپ ءوتتى.
"بۇل نە سۇمدىق؟! بۇعان كىم جول بەرىپ وتىر؟!" – دەپ نارازىلىعىن ءبىلدىردى دەپۋتات.
ساۋالدا كوتەرىلگەن نەگىزگى ۇسىنىستار:
-
مەملەكەتتىك تۋدى زاڭسىز وزگەرتكەن ادامدار مەن ۇيىمداستىرۋشىلاردى انىقتاپ، قاتاڭ جازا قولدانۋ.
-
زاڭسىز وزگەرتىلگەن مەملەكەتتىك رامىزدەردى ساتۋعا تىيىم سالىپ، ولاردى نارىقتان الىپ تاستاۋ.
-
راديكالدى اعىمداردىڭ ارەكەتتەرىن باقىلاۋدى كۇشەيتىپ، زاڭنامانى قاتايتۋ.
-
ورتا مەكتەپتەردە ءدىنتانۋ ساباقتارىن ۇلتتىق قۇندىلىقتارعا نەگىزدەۋ.
-
ۇلتتىق مادەنيەتتى دامىتۋ جانە ءداستۇرلى كيىم كيۋ باستامالارىن قولداۋ.
دەپۋتات بۇل ماسەلە قوعام تۇراقتىلىعىنا قاۋىپ ءتوندىرۋى مۇمكىن ەكەنىن ەسكەرتىپ، مەملەكەتتىك ورگانداردان شۇعىل ارەكەت ەتۋدى تالاپ ەتتى.
"ءبىز مۇنداي قاۋىپتەرگە كوز جۇمىپ قاراي المايمىز. مۇنداي ارانداتۋشىلىقتىڭ جولىن كەسۋ ءۇشىن، ءتيىستى ورگاندار دەرەۋ شارا قولدانۋى كەرەك" – دەپ تۇيىندەدى ەرمۇرات باپي.
