QR Bas prokýrory Berik Asylovqa depýtat Ermurat Bapı qoǵamda rezonans týdyrǵan máselelerge qatysty depýtattyq saýal joldady, dep habarlaıdy "Adyrna" ulttyq portaly.
Depýtattyń aıtýynsha, sońǵy ýaqytta ulttyq qundylyqtar men dástúrlerge shabýyl jasaıtyn oqıǵalar jıilep ketti. Sonyń ishinde, Atyraýda memlekettik rámizge qatysty zań buzýshylyq úlken alańdaýshylyq týǵyzdy. Muz aıdynynda ótken sporttyq jarys kezinde tórt áıel Qazaqstannyń memlekettik týyn ustap turǵan sýreti taraǵan. Alaıda týdyń betinde arab jazýy men qylysh beınelengen belgi bolǵan.
Ermurat Bapı bul áreketti qarapaıym quqyqbuzýshylyq emes, elimizdiń memlekettigi men ulttyq biregeıligine qarsy jasalǵan ashyq arandatý dep baǵalady.
"Bul – bizdiń qoǵamymyzǵa, memlekettigimizge, ulttyq dástúrimiz ben biregeıligimizge jasalǵan ashyq jáne naqaq qarsylyq. Memlekettik týdy qorlaý – búkil halyqty, tutas memleketti qorlaý!" – dedi ol.
Sonymen qatar, depýtat Wildberries Russ platformasynda Qazaqstan týynyń burmalanǵan nusqasy satylymda turǵanyn málimdedi. Bul jaǵdaıdyń qalaı oryn alǵanyn anyqtaý jáne jaýapty tulǵalardy jazalaý qajet ekenin atap ótti.
"Bul ne sumdyq?! Buǵan kim jol berip otyr?!" – dep narazylyǵyn bildirdi depýtat.
Saýalda kóterilgen negizgi usynystar:
-
Memlekettik týdy zańsyz ózgertken adamdar men uıymdastyrýshylardy anyqtap, qatań jaza qoldaný.
-
Zańsyz ózgertilgen memlekettik rámizderdi satýǵa tyıym salyp, olardy naryqtan alyp tastaý.
-
Radıkaldy aǵymdardyń áreketterin baqylaýdy kúsheıtip, zańnamany qataıtý.
-
Orta mektepterde dintaný sabaqtaryn ulttyq qundylyqtarǵa negizdeý.
-
Ulttyq mádenıetti damytý jáne dástúrli kıim kııý bastamalaryn qoldaý.
Depýtat bul másele qoǵam turaqtylyǵyna qaýip tóndirýi múmkin ekenin eskertip, memlekettik organdardan shuǵyl áreket etýdi talap etti.
"Biz mundaı qaýipterge kóz jumyp qaraı almaımyz. Mundaı arandatýshylyqtyń jolyn kesý úshin, tıisti organdar dereý shara qoldanýy kerek" – dep túıindedi Ermurat Bapı.
