QR Bas prokurory Berık Asylovqa deputat Ermūrat Bapi qoǧamda rezonans tudyrǧan mäselelerge qatysty deputattyq saual joldady, dep habarlaidy "Adyrna" ūlttyq portaly.
Deputattyŋ aituynşa, soŋǧy uaqytta ūlttyq qūndylyqtar men dästürlerge şabuyl jasaityn oqiǧalar jiılep kettı. Sonyŋ ışınde, Atyrauda memlekettık rämızge qatysty zaŋ būzuşylyq ülken alaŋdauşylyq tuǧyzdy. Mūz aidynynda ötken sporttyq jarys kezınde tört äiel Qazaqstannyŋ memlekettık tuyn ūstap tūrǧan suretı taraǧan. Alaida tudyŋ betınde arab jazuy men qylyş beinelengen belgı bolǧan.
Ermūrat Bapi būl ärekettı qarapaiym qūqyqbūzuşylyq emes, elımızdıŋ memlekettıgı men ūlttyq bıregeilıgıne qarsy jasalǧan aşyq arandatu dep baǧalady.
"Būl – bızdıŋ qoǧamymyzǧa, memlekettıgımızge, ūlttyq dästürımız ben bıregeilıgımızge jasalǧan aşyq jäne naqaq qarsylyq. Memlekettık tudy qorlau – bükıl halyqty, tūtas memlekettı qorlau!" – dedı ol.
Sonymen qatar, deputat Wildberries Russ platformasynda Qazaqstan tuynyŋ būrmalanǧan nūsqasy satylymda tūrǧanyn mälımdedı. Būl jaǧdaidyŋ qalai oryn alǧanyn anyqtau jäne jauapty tūlǧalardy jazalau qajet ekenın atap öttı.
"Būl ne sūmdyq?! Būǧan kım jol berıp otyr?!" – dep narazylyǧyn bıldırdı deputat.
Saualda köterılgen negızgı ūsynystar:
-
Memlekettık tudy zaŋsyz özgertken adamdar men ūiymdastyruşylardy anyqtap, qataŋ jaza qoldanu.
-
Zaŋsyz özgertılgen memlekettık rämızderdı satuǧa tyiym salyp, olardy naryqtan alyp tastau.
-
Radikaldy aǧymdardyŋ äreketterın baqylaudy küşeitıp, zaŋnamany qataitu.
-
Orta mektepterde dıntanu sabaqtaryn ūlttyq qūndylyqtarǧa negızdeu.
-
Ūlttyq mädeniettı damytu jäne dästürlı kiım kiiu bastamalaryn qoldau.
Deputat būl mäsele qoǧam tūraqtylyǧyna qauıp töndıruı mümkın ekenın eskertıp, memlekettık organdardan şūǧyl äreket etudı talap ettı.
"Bız mūndai qauıpterge köz jūmyp qarai almaimyz. Mūndai arandatuşylyqtyŋ jolyn kesu üşın, tiıstı organdar dereu şara qoldanuy kerek" – dep tüiındedı Ermūrat Bapi.
