11 تامىزدا ماجارستان دەپۋتاتتارى بۇرىنعى پرەمەر-مينيستر ۆيكتور ورباننىڭ تۇسىندا قىزمەتىنەن بوساتىلعان جوعارعى سوتتىڭ بۇرىنعى توراعاسى اندراش باكانى ەلدىڭ جاڭا پرەزيدەنتى ەتىپ سايلادى، دەپ حابارلايدى «ادىرنا» ءتىلشىسى.
بۇل قىزمەت شىلدە ايىندا بوساپ قالعان ەدى. سەبەبى ەلدىڭ جاڭا پرەمەر-ءمينيسترى پەتەر ماديار ورباننىڭ جاقتاسى بولعان بۇرىنعى پرەزيدەنتتى قىزمەتىنەن كەتىرگەن بولاتىن.
باكانىڭ كانديداتۋراسىن 140 دەپۋتات قولداپ داۋىس بەرسە، التاۋى قارسى شىققان. قالىس قالعاندار بولماعان.
ول قىزمەتىنە 19 تامىزدا كىرىسپەك. وعان دەيىن پرەزيدەنت مىندەتىن پارلامەنت سپيكەرى اگنەش فورستحوففەر اتقارادى.
73 جاستاعى اندراش باكا — بەلگىلى زاڭگەر-عالىم. 1991 جىلى ول ستراسبۋرگتەگى ەۋروپالىق ادام قۇقىقتارى سوتىنىڭ العاشقى ماجار سۋدياسى اتانىپ، بۇل قىزمەتتە 17 جىل ەڭبەك ەتكەن. ونىڭ ىشىندە ون جىل بويى سوت بولىمشەسى توراعاسىنىڭ ورىنباسارى قىزمەتىن اتقارعان.
2009 جىلى ماجارستان پارلامەنتى باكانى التى جىل مەرزىمگە جوعارعى سوت توراعاسى ەتىپ سايلاعان. الايدا وسى قىزمەتتە جۇرگەندە ول ەكس-پرەمەر ۆيكتور وربان ۇكىمەتىمەن اشىق تەكەتىرەسكە ءتۇسىپ، سونىڭ سالدارىنان وكىلەتتىگى مەرزىمىنەن بۇرىن توقتاتىلعان.
كەيىن باكا ەۋروپالىق ادام قۇقىقتارى سوتىنا شاعىم ءتۇسىرىپ، سوت ماجارستان بيلىگى ونىڭ قۇقىقتارىن بۇزعانىن مويىنداپ، شامامەن 100 مىڭ ەۋرو وتەماقى تولەۋگە مىندەتتەگەن. الايدا بيلىك بۇل شەشىممەن كەلىسكەن جوق.
ودان كەيىن باكا جوعارعى سوتتىڭ ورنىنا قۇرىلعان ماجارستان كۋرياسىنىڭ سۋدياسى بولىپ قالىپ، 2020 جىلى زەينەتكە شىققانعا دەيىن ونىڭ سوت القاسىن باسقارعان.
شىلدە ايىندا پرەمەر-مينيستر پەتەر ماديار مەملەكەت باسشىسى لاۋازىمىنا اتاقتى شاحماتشى يۋديت پولگاردىڭ كانديداتۋراسىن ۇسىنعان بولاتىن. ونىڭ ايتۋىنشا، ماجارستانعا رەسپۋبليكا ازاماتتارىنىڭ بارلىعىن بىرىكتىرە الاتىن تاۋەلسىز پرەزيدەنت قاجەت.
ماديار گروسسمەيستەردىڭ كانديداتۋراسىن ەلدىڭ بەدەلدى قوعام قايراتكەرلەرى ۇسىنعانىن ايتتى. الايدا يۋديت پولگار بۇل ۇسىنىستان باس تارتىپ، بولىنگەن ۇلتتى بىرىكتىرۋ جاۋاپكەرشىلىگىن موينىنا الۋعا كۇش-جىگەرى جەتكىلىكسىز ەكەنىن مالىمدەدى.
بۇرىنعى پرەزيدەنت تاماش شۋيوكتىڭ وكىلەتتىگى كونستيتۋتسياعا ەنگىزىلگەن 17-تۇزەتۋدى يمپيچمەنت قاۋپى جاعدايىندا ماقۇلداعاننان كەيىن توقتاتىلعان ەدى. شۋيوكتىڭ ءوزى بۇل وزگەرىستەرگە قارسى بولىپ، ولاردىڭ پرەزيدەنت ينستيتۋتىنىڭ اتقارۋشى بيلىككە تاۋەلدىلىگىن كۇشەيتەتىنىن ەسكەرتكەن ەدى.
