اتىراۋدا قارا جامىلعان قىزداردىڭ قازاقستان تۋىن قورلاعان سۋرەتىنە قاتىستى مادەنيەت جانە اقپارات مينيسترلىگى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
مينيسترلىك ينتەرنەتكە جۇرگىزگەن مونيتورينگ بويىنشا، ستاندارتقا ساي ەمەس قازاقستان تۋىن ساتقان 2 زاڭ بۇزۋشىلىقتى انىقتاعان.
“Wildberries.kz جانە ozon.kz ينتەرنەت-رەسۋرستارىندا ينتەرنەتكە جۇرگىزىلگەن مونيتورينگ ناتيجەلەرى بويىنشا قازاقستان رەسپۋبليكاسىنىڭ مەملەكەتتىك رامىزدەرى تۋرالى زاڭناماسىن بۇزاتىن ماتەريالدى تاراتۋ بولىگىندە 2 زاڭ بۇزۋشىلىق انىقتالدى. قازىرگى ۋاقىتتا wildberries.kz ينتەرنەت-رەسۋرسىنان قازاقستان رەسپۋبليكاسىنىڭ اراب جازۋى بار تۋىنىڭ ساتىلعانى تۋرالى اقپارات جويىلدى. قازاقستان رەسپۋبليكاسىنىڭ زاڭناماسىن بۇزۋشىلىقتاردى جويۋ جانە زاڭسىز ماتەريالدى جويۋ شارالارىن قولدانۋ تۋرالى ozon.kz ينتەرنەت-رەسۋرسىنىڭ اكىمشىلىگىنە حابارلاما حات جولداندى”، — دەپ جازىلعان رەسمي مالىمەتتە.
سونداي-اق مينيسترلىك وسى وقيعا بويىنشا ىشكى ىستەر مينيسترلىگىنە حات جولداعان.
“قازاقستان رەسپۋبليكاسى قىلمىستىق كودەكسىنىڭ 372-بابىنا سايكەس قازاقستان رەسپۋبليكاسىنىڭ مەملەكەتتىك رامىزدەرىن قورلاۋ قىلمىستىق جاۋاپتىلىققا اكەپ سوعادى. وسىعان بايلانىستى قازاقستان رەسپۋبليكاسى مادەنيەت جانە اقپارات مينيسترلىگى ىشكى ىستەر مينيسترلىگىنە ءوز قۇزىرەتى شەگىندە پروتسەسسۋالدىق شارالار قابىلداۋ تۋرالى حابارلاما حات جولدادى”، — دەلىنگەن مينيسترلىك تاراتقان اقپاراتتا.
مينيسترلىك ءىىم-نەن ناقتى كىمگە قارسى شارا قابىلداۋدى سۇراعانىن ناقتىلادىق.
“ستاندارتقا ساي ەمەس قازاقستان تۋىنىڭ سۋرەتىن جارنامالاۋعا اتىراۋلىق تۇرعىندار كىنالى مە، الدە Wildberries.kz جانە ozon.kz پلاتفتورمالارى كىنالى مە، ونى ءىىم انىقتايدى”، — دەپ ءتۇسىندىردى مينيسترلىكتەگىلەر.
بۇعان دەيىن اتىراۋدا وزگە تىلدە جازىلعان جازۋى بار مەملەكەتتىك تۋمەن فوتوعا تۇسكەندەر ۇستالعانى ءمالىم بولعان ەدى.
