Atyraýda qara jamylǵan qyzdardyń Qazaqstan týyn qorlaǵan sýretine qatysty Mádenıet jáne aqparat mınıstrligi pikir bildirdi, dep habarlaıdy “Adyrna” ulttyq portaly.
Mınıstrlik ınternetke júrgizgen monıtorıng boıynsha, standartqa saı emes Qazaqstan Týyn satqan 2 zań buzýshylyqty anyqtaǵan.
“Wildberries.kz jáne ozon.kz ınternet-resýrstarynda ınternetke júrgizilgen monıtorıng nátıjeleri boıynsha Qazaqstan Respýblıkasynyń memlekettik rámizderi týraly zańnamasyn buzatyn materıaldy taratý bóliginde 2 zań buzýshylyq anyqtaldy. Qazirgi ýaqytta wildberries.kz ınternet-resýrsynan Qazaqstan Respýblıkasynyń arab jazýy bar Týynyń satylǵany týraly aqparat joıyldy. Qazaqstan Respýblıkasynyń zańnamasyn buzýshylyqtardy joıý jáne zańsyz materıaldy joıý sharalaryn qoldaný týraly ozon.kz ınternet-resýrsynyń ákimshiligine habarlama hat joldandy”, — dep jazylǵan resmı málimette.
Sondaı-aq mınıstrlik osy oqıǵa boıynsha Ishki ister mınıstrligine hat joldaǵan.
“Qazaqstan Respýblıkasy Qylmystyq kodeksiniń 372-babyna sáıkes Qazaqstan Respýblıkasynyń memlekettik rámizderin qorlaý qylmystyq jaýaptylyqqa ákep soǵady. Osyǵan baılanysty Qazaqstan Respýblıkasy Mádenıet jáne aqparat mınıstrligi Ishki ister mınıstrligine óz quzyreti sheginde proessýaldyq sharalar qabyldaý týraly habarlama hat joldady”, — delingen mınıstrlik taratqan aqparatta.
Mınıstrlik IIM-nen naqty kimge qarsy shara qabyldaýdy suraǵanyn naqtyladyq.
“Standartqa saı emes Qazaqstan Týynyń sýretin jarnamalaýǵa atyraýlyq turǵyndar kináli me, álde Wildberries.kz jáne ozon.kz platftormalary kináli me, ony IIM anyqtaıdy”, — dep túsindirdi mınıstrliktegiler.
Buǵan deıin Atyraýda ózge tilde jazylǵan jazýy bar memlekettik týmen fotoǵa túskender ustalǵany málim bolǵan edi.
