جەتىسۋ وبلىسىنىڭ سارقان اۋدانىندا ءبىلىم بولىمىنە قاراستى بۋحگالتەرلەر 1,6 ميلليارد تەڭگە بيۋدجەت قاراجاتىن جىمقىرعانى ءۇشىن سوتتالدى، دەپ حابارلايدى "ادىرنا" ۇلتتىق پورتالى Astana TV-عا سىلتەپ.
انتيكوردىڭ مالىمەتىنشە، تالدىقورعان قالالىق سوتى سارقان اۋدانىنىڭ ءبىلىم ءبولىمى مەملەكەتتىك مەكەمەسىنىڭ باس بۋحگالتەرى مەن ەسەپشىلەرى، قازپوشتا اق اۋداندىق ءبولىمىنىڭ باستىعى، ايدانا ياسلي-باقشاسىنىڭ ۋاقىتشا مەڭگەرۋشىسى جانە جەتىسۋ وبلىسى مەملەكەتتىك كىرىستەر دەپارتامەنتىنىڭ كامەرالدىق باقىلاۋ ءبولىمىنىڭ باسشىسىنا ۇكىم شىعاردى.
تەرگەۋ ناتيجەسىندە تۇلعالار قىزمەتكەرلەردىڭ جالاقىسىنا ارتىق اقشا اۋدارۋ ارقىلى مەملەكەت قارجىسىن جىمقىرعانى انىقتالدى. سونىمەن قاتار، ولار اۋديتورلىق تەكسەرىس جۇرگىزبەۋ ماقساتىندا شەنەۋنىككە پارا بەرمەك بولعان.
سوت شەشىمىمەن باس ەسەپشى 8 جىلعا، ارىپتەستەرى 7 جىلعا باس بوستاندىعىنان ايىرىلدى.
سوتتالعاندار مەملەكەتتىك قىزمەتتە جانە كۆازيمەملەكەتتىك سەكتوردا جۇمىس ىستەۋ قۇقىعىنان ءومىر بويىنا ايىرىلدى. قازىرگى تاڭدا سوت ۇكىمى زاڭدى كۇشىنە ەنگەن جوق.
