ءاربىر قوعامنىڭ وركەنيەتتىلىگىن، ادامگەرشىلىگىن كورسەتەتىن ماڭىزدى اسپەكتىلەردىڭ ءبىرى – مۇمكىندىگى شەكتەۋلى ازاماتتارعا دەگەن كوزقاراس پەن ولاردىڭ قوعامدا تولىققاندى ءومىر سۇرۋىنە مۇمكىندىك بەرۋ. ەرەكشە قاجەتتىلىكتەرى بار ادامداردى قولداۋ جانە ولاردىڭ قوعامعا تەڭ قۇقىلى مۇشەلەر رەتىندە ارالاسۋىن قامتاماسىز ەتۋ تەك مەملەكەتتىڭ ەمەس، ءار ازاماتتىڭ مىندەتى. ينكليۋزيا ۇعىمى وسى باعىتتا وتە ماڭىزدى ءرول اتقارادى. بۇل ۇعىمنىڭ ءمانى – بارلىعىنا تەڭ مۇمكىندىك بەرىپ، ەشكىمدى قوعامنان شەتتەتپەيتىن ورتا قالىپتاستىرۋ.
قازاقستاندا ەرەكشە قاجەتتىلىكتەرى بار ادامداردىڭ سانى 700 مىڭنان استام. بۇل ادامداردىڭ كوپشىلىگى كۇندەلىكتى ومىردە ءتۇرلى كەدەرگىلەرگە تاپ بولادى. ولاردىڭ ءبىلىم الۋعا، جۇمىس ىستەۋگە، مادەني جانە الەۋمەتتىك ومىرگە بەلسەنە ارالاسۋعا، دەمالۋعا قۇقىلارى بار ەكەنى زاڭمەن بەكىتىلگەن. وسى قۇقىقتاردىڭ ىسكە اسۋىن قامتاماسىز ەتۋ – قوعامنىڭ ادامگەرشىلىك مىندەتى.
ەرەكشە قاجەتتىلىكتەرى بار ادامداردى قولداۋ كوپتەگەن باعىتتاردى قامتيدى. بىرىنشىدەن، ءبىلىم بەرۋ سالاسىندا ينكليۋزياعا ەرەكشە كوڭىل بولىنەدى. بۇگىنگى تاڭدا قازاقستاندا ارنايى رەسۋرستىق ورتالىقتار مەن ينكليۋزيۆتى ءبىلىم بەرۋ باعدارلامالارى مەكتەپتەردە جۇزەگە اسىرىلۋدا. بۇل بالالاردىڭ ساپالى ءبىلىم الۋىنا مۇمكىندىك بەرەدى. مۇعالىمدەر ينكليۋزيۆتى وقىتۋ ادىستەرىن مەڭگەرىپ، ەرەكشە قاجەتتىلىكتەرى بار بالالارعا ارنالعان وقىتۋ ادىستەمەلەرى كەڭىنەن قولدانىلۋدا. سونىمەن قاتار، ونلاين ءبىلىم بەرۋ پلاتفورمالارى ەرەكشە قاجەتتىلىكتەرى بار بالالار ءۇشىن ۇيدەن ءبىلىم الۋ مۇمكىندىگىن ارتتىرۋدا.
ەكىنشىدەن، جۇمىس سالاسىندا دا ەرەكشە قاجەتتىلىكتەرى بار ازاماتتارعا قولداۋ كورسەتۋ ماڭىزدى. قازاقستاندا مۇمكىندىگى شەكتەۋلى ازاماتتاردى جۇمىسقا ورنالاستىرۋ ءۇشىن ارنايى باعدارلامالار ىسكە اسىرىلۋدا. جۇمىس ورىندارى ءۇشىن كۆوتا ەنگىزىلىپ، كاسىپكەرلەردى ەرەكشە قاجەتتىلىكتەرى بار ازاماتتاردى جۇمىسقا الۋعا ىنتالاندىرۋ باعىتىندا شارالار قابىلدانۋدا. سونىمەن قاتار، مۇمكىندىگى شەكتەۋلى ادامداردىڭ كاسىپكەرلىكپەن اينالىسۋىنا جاعداي جاسالىپ، ولارعا گرانتتار مەن جەڭىلدىكتى نەسيەلەر بەرىلەدى.
ۇشىنشىدەن، قوعامدىق ومىردە ەرەكشە قاجەتتىلىكتەرى بار ادامدار ءۇشىن قولجەتىمدى ورتا قالىپتاستىرۋ ماسەلەسى دە ماڭىزدى. پاندۋستار، تاكتيلدى جولاقتار، برايل الىپپەسىمەن جازىلعان بەلگىلەر جانە دىبىستىق اقپاراتتىق جۇيەلەر ورناتىلۋى ءتيىس. بۇل ادامداردىڭ قوعامدىق ورىنداردا ءجۇرىپ-تۇرۋىن جەڭىلدەتەدى. قازاقستاندا بۇل باعىتتا وڭ وزگەرىستەر بايقالادى، بىراق ءالى دە كوپتەگەن عيماراتتار مەن كولىك ينفراقۇرىلىمىندا كەدەرگىلەر بار.
دەگەنمەن، بارلىق تەحنيكالىق جانە زاڭنامالىق وزگەرىستەردەن دە ماڭىزدىسى – قوعامنىڭ ەرەكشە قاجەتتىلىكتەرى بار ادامدارعا دەگەن كوزقاراسى. ولار تۋرالى ويلاۋ مەن قاتىناس جاساۋ مادەنيەتى دۇرىس قالىپتاسۋى كەرەك. قامقورلىق كورسەتۋ – بۇل ادامداردى اياۋ نەمەسە شەكتەۋ ەمەس، ولاردىڭ الەۋەتىن تولىقتاي اشۋعا مۇمكىندىك بەرۋ. ەرەكشە قاجەتتىلىكتەرى بار ادامداردى قۇرمەتتەۋ، ولارعا قوعامنىڭ تولىققاندى مۇشەسى رەتىندە قاراۋ جانە ولارمەن تەڭ قارىم-قاتىناس جاساۋ ماڭىزدى.
ءاربىر ازامات مۇمكىندىگى شەكتەۋلى ادامدارعا قۇرمەتپەن قاراپ، ولاردى قوعامنىڭ بولىگى رەتىندە قابىلداۋعا مىندەتتى. كومەك قاجەت بولعان جاعدايدا سىپايى تۇردە قولداۋ كورسەتۋ كەرەك. ارقايسىمىزدىڭ بۇل باعىتتاعى ءىس-ارەكەتىمىز ينكليۋزيۆتى قوعامنىڭ قالىپتاسۋىنا ىقپال ەتەدى.
ينكليۋزيۆتى قوعام قۇرۋ – ءاربىر ازاماتتىڭ، ءاربىر ۇرپاقتىڭ مىندەتى. ەرەكشە قاجەتتىلىكتەرى بار ادامدارعا قولايلى جاعداي جاساۋ ارقىلى ءبىز ءوزىمىزدىڭ ادامگەرشىلىگىمىزدى، مەيىرىمدىلىگىمىزدى كورسەتەمىز. بۇل – ءبىزدىڭ مەملەكەتىمىزدىڭ دامۋىنا، وركەنيەتتى قوعام قۇرۋعا قوسقان ۇلەسىمىز.
