استاناداعى ۇلتتىق پانتەون باستاپقىدا 25 جەرلەۋ ورنىنا ەسەپتەلگەنىمەن، قازىرگى تاڭدا 28 ادام جەرلەنگەن. قاجەتتىلىك تۋىنداعان جاعدايدا، ورىن سانى 40-قا دەيىن كوبەيتىلۋى مۇمكىن، دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەپ.
بۇل تۋرالى استانا قالاسىنىڭ كوممۋنالدىق شارۋاشىلىق باسقارماسى مالىمدەدى.
قازىرگى تاڭدا پانتەوننىڭ جالپى اۋماعى 4,3 گەكتاردى قۇرايدى. باسقارما وكىلدەرىنىڭ ايتۋىنشا، ءبىرىنشى كەزەڭنىڭ العاشقى ىسكە قوسىلۋى 25 ورىنعا ەسەپتەلگەن. دەگەنمەن، جوبادا وزگەرىستەر ەنگىزۋ ارقىلى ورىن سانىن كوبەيتۋگە مۇمكىندىك بار.
2023 جىلدىڭ مامىرىندا ۇلتتىق پانتەوندا ورىندار جەتىسپەيتىنى تۋرالى اقپارات تارادى. ەسىل اۋدانى اكىمىنىڭ ورىنباسارى دارمەنيار قىدىربەكۇلىنىڭ ايتۋىنشا، سول كەزدە پانتەوندا 25 ورىننىڭ تورتەۋى عانا بوس بولعان. الايدا ءۇش اي وتكەن سوڭ قالالىق ءماسليحات توراعاسى ەرلان كاناليموۆ بۇل مالىمەتتى جوققا شىعارىپ، پانتەوندا 40-تان استام ورىن بار ەكەنىن جانە جوبا ءالى تولىق اياقتالماعانىن مالىمدەدى.
ۇلتتىق پانتەون قازاقستاننىڭ دامۋىنا ايتارلىقتاي ۇلەس قوسقان تۇلعالاردىڭ، عىلىم جانە مادەنيەت قايراتكەرلەرىنىڭ جەرلەۋ ورنى رەتىندە قۇرىلعان. ول استانادان 17 شاقىرىم جەردە، قابانباي باتىر كەسەنەسىنىڭ ماڭىندا ورنالاسقان. پانتەون اۋماعى ءتورت گەكتاردى قۇرايدى.
دارمەنيار قىدىربەكۇلىنىڭ مالىمەتىنشە، 2024 جىلى پانتەوندى كۇتىپ ۇستاۋعا 40 ميلليون تەڭگە بولىنگەن. سونىمەن قاتار، اۋماقتى كوگالداندىرۋ ءۇشىن قوسىمشا 70 ميلليون تەڭگە قاراستىرىلعان.
2023 جىلى ناۋرىز ايىندا پانتەوندا جەرلەنۋى مۇمكىن تۇلعالاردىڭ ءتىزىمى جاڭارتىلدى. بۇرىن بۇل ورىن قازاقستان پرەزيدەنتتەرى مەن ولاردىڭ وتباسى مۇشەلەرىنە عانا ارنالسا، بۇگىندە وعان ەلگە ەڭبەگى سىڭگەن تۇلعالار دا قوسىلعان.
