Astanadaǵy Ulttyq panteon bastapqyda 25 jerleý ornyna eseptelgenimen, qazirgi tańda 28 adam jerlengen. Qajettilik týyndaǵan jaǵdaıda, oryn sany 40-qa deıin kóbeıtilýi múmkin, dep habarlaıdy "Adyrna" ulttyq portaly Tengrinews.kz saıtyna siltep.
Bul týraly Astana qalasynyń kommýnaldyq sharýashylyq basqarmasy málimdedi.
Qazirgi tańda panteonnyń jalpy aýmaǵy 4,3 gektardy quraıdy. Basqarma ókilderiniń aıtýynsha, birinshi kezeńniń alǵashqy iske qosylýy 25 orynǵa eseptelgen. Degenmen, jobada ózgerister engizý arqyly oryn sanyn kóbeıtýge múmkindik bar.
2023 jyldyń mamyrynda Ulttyq panteonda oryndar jetispeıtini týraly aqparat tarady. Esil aýdany ákiminiń orynbasary Darmenııar Qydyrbekulynyń aıtýynsha, sol kezde panteonda 25 orynnyń tórteýi ǵana bos bolǵan. Alaıda úsh aı ótken soń qalalyq máslıhat tóraǵasy Erlan Kanalımov bul málimetti joqqa shyǵaryp, panteonda 40-tan astam oryn bar ekenin jáne joba áli tolyq aıaqtalmaǵanyn málimdedi.
Ulttyq panteon Qazaqstannyń damýyna aıtarlyqtaı úles qosqan tulǵalardyń, ǵylym jáne mádenıet qaıratkerleriniń jerleý orny retinde qurylǵan. Ol Astanadan 17 shaqyrym jerde, Qabanbaı batyr kesenesiniń mańynda ornalasqan. Panteon aýmaǵy tórt gektardy quraıdy.
Darmenııar Qydyrbekulynyń málimetinshe, 2024 jyly panteondy kútip ustaýǵa 40 mıllıon teńge bólingen. Sonymen qatar, aýmaqty kógaldandyrý úshin qosymsha 70 mıllıon teńge qarastyrylǵan.
2023 jyly naýryz aıynda panteonda jerlenýi múmkin tulǵalardyń tizimi jańartyldy. Buryn bul oryn Qazaqstan prezıdentteri men olardyń otbasy múshelerine ǵana arnalsa, búginde oǵan elge eńbegi sińgen tulǵalar da qosylǵan.
