26 ناۋرىزدا قازاقستان پرەزيدەنتى قاسىم-جومارت توقاەۆ «ۇلى وتان سوعىسىنداعى جەڭىسكە 80 جىل» بىرىڭعاي مەرەيتويلىق مەدالى تۋرالى» جارلىققا قول قويدى، دەپ حابارلايدى "ادىرنا" ۇلتتىق پورتالى.
اتالعان مەدالمەن ۇلى وتان سوعىسىنىڭ ارداگەرلەرى، تىل ەڭبەككەرلەرى جانە سوعىس جىلدارىندا جانقيارلىق ەڭبەك ەتكەن ازاماتتار ماراپاتتالادى. ولاردىڭ قاتارىنا:
ۇلى وتان سوعىسىنا قاتىسقان اسكەري قىزمەتشىلەر، پارتيزاندار مەن استىرتىن توپ مۇشەلەرى;
سوعىس جىلدارى جاراقات، كونتۋزيا نەمەسە اۋرۋ سالدارىنان مۇگەدەكتىك العان تۇلعالار;
قورشاۋداعى لەنينگرادتا جۇمىس ىستەپ، ارنايى ماراپاتتارعا يە بولعان ازاماتتار;
فاشيستىك كونتسلاگەرلەر مەن گەتتودا بولعان كامەلەتكە تولماعان تۇتقىندار;
سوعىس كەزىندە قاجىرلى ەڭبەك ەتكەنى ءۇشىن كەڭەس وداعىنىڭ وردەندەرى مەن مەدالدارىمەن ماراپاتتالعان نەمەسە كەمىندە التى اي جۇمىس ىستەگەن ازاماتتار;
سوعىستا قازا تاپقان جاۋىنگەرلەردىڭ قايتا نەكەگە تۇرماعان جەسىرلەرى كىرەدى.
مەرەيتويلىق مەدال ارداگەرلەر مەن سوعىس جىلدارىندا ەرەن ەڭبەك ەتكەن ازاماتتاردىڭ ەڭبەگىن قۇرمەتتەۋگە باعىتتالعان.
