اقتاۋداعى 19-شاعىن اۋداندا قوقىس جاشىكتەرى جەر استىنا ءتۇسىپ كەتكەن، دەپ حابارلايدى "ادىرنا" ۇلتتىق پورتالى Lada.kz سايتىنا سىلتەمە جاساپ.
مەردىگەر كومپانياعا قالپىنا كەلتىرۋ جۇمىستارىن جۇرگىزۋ مىندەتتەلدى.
وقيعا "راحات-2" تۇرعىن ءۇي كەشەنى اۋماعىندا بولعان. تۇرعىنداردىڭ ايتۋىنشا، تولاسسىز جاۋىن-شاشىن سالدارىنان توپىراقتى سۋ شايىپ، جاڭادان ورناتىلعان جەراستى قوقىس كونتەينەرلەرى جەرگە ءتۇسىپ كەتكەن.
"بۇل – ماتەريال ساپاسىنا مۇلدە نەمقۇرايلى قاراۋدىڭ بەلگىسى. العاشقى جاۋىن-شاشىندا-اق اقاۋلار انىقتالدى،" – دەيدى كوپقاباتتى ءۇيدىڭ تۇرعىندارى.
اقتاۋ قالالىق اكىمدىگىنىڭ ءباسپاسوز قىزمەتى مالىمدەگەندەي، بۇل ماسەلەمەن تكش ءبولىمى اينالىسىپ جاتىر. ءوز كەزەگىندە، ولار مەردىگەر ۇيىمعا بارلىعىن باستاپقى قالپىنا كەلتىرۋدى تاپسىرعان.
قازىرگى ۋاقىتتا وقيعا ورنىندا قورشاۋلار قويىلعان. شەنەۋنىكتەردىڭ ايتۋىنشا، قالپىنا كەلتىرۋ جۇمىستارى اۋا رايى تۇراقتانعاننان كەيىن جۇرگىزىلەدى.
ازىرگە مەردىگەر ۇيىمنىڭ اتاۋى جاريالانعان جوق. سونىمەن قاتار، اتالعان ۋرنالار مەن جۇمىستارعا قانشا قاراجات بولىنگەنى بەلگىسىز.
