تبيليسيدە ءوتىپ جاتقان پارادزيۋدودان الەم كۋبوگىندە قازاقستان سپورتشىلارى جوعارى ناتيجە كورسەتتى، دەپ حابارلايدى "ادىرنا" ۇلتتىق پورتالى.
ايەلدەر اراسىنداعى J2 -52 كگ سالماق دارەجەسىندە بەلدەسكەن اقمارال ناۋاتبەك جارىس چەمپيونى اتاندى. ول فينالدا گەرمانيا سپورتشىسى يزوبەل تايدى اۋىرتۋ ءادىسى ارقىلى جەڭىپ، التىن مەدال يەلەندى.
ايتا كەتەيىك، بۇل – اقمارال ناۋاتبەكتىڭ 2024 جىلعى پاريج پاراليمپياداسىنان كەيىنگى العاشقى جارىسى. ول وليمپيادا چەمپيوندارىنا عانا ارنالعان التىن جازۋلى كيمونودا كۇرەسىپ، ءوزىنىڭ مىقتىلىعىن تاعى ءبىر دالەلدەدى.
ەسكە سالا كەتەيىك، اقمارال ناۋاتبەك – 2024 جىلعى پاريج پاراليمپياداسىنىڭ چەمپيونى. وسى جەڭىسىنەن كەيىن ول «دارىن» جاستار سىيلىعى مەن «حالىق سۇيىكتىسى» ارنايى سىيلىعىنا يە بولعان ەدى.
بۇدان بولەك، J1 -52 كگ ساناتى بويىنشا سىنعا تۇسكەن 18 جاستاعى الفيا تىلەكقابىل دا التىننان القا تاقتى. فينالدا بەيتاراپ تۋ استىندا بەلدەسكەن ۆيكتوريا پوتاپوۆانى جەڭگەن جاس سپورتشى فينالعا جەتۋ جولىندا ەكى بىردەي پاراليمپيادا جۇلدەگەرىن جارىستان شىعاردى.
ەرلەر اراسىندا قازاقستان نامىسىن قورعاعان عالىمجان سماعۇلۇلى (J2 -82 كگ) فينالدا لاتۆيالىق قارسىلاسىنا جول بەرىپ، كۇمىس مەدالعا يە بولدى.
