وڭتۇستىك كورەيا پارلامەنتى 2024 جىلى جەلتوقساندا يمپيچمەنت جاريالاعان كورەيا رەسپۋبليكاسىنىڭ پرەمەر-ءمينيسترى حان دوك سۋ ەلدىڭ كونستيتۋتسيالىق سوتىنىڭ شەشىمىمەن قىزمەتىنە قايتا ورالدى. بۇل تۋرالى 24 ناۋرىزدا Yonhap اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، حان دوك سۋ قايتادان وڭتۇستىك كورەيا پرەزيدەنتىنىڭ مىندەتىن اتقارۋشى بولىپ، ەلدە اسكەري جاعداي ەنگىزۋگە ارەكەت جاساعاننان كەيىن پرەزيدەنتتىك لاۋازىمىنان بوساتىلعان يۋن سوك ءيولدىڭ ورنىنا كەلدى.
وڭتۇستىك كورەيا پرەزيدەنتىنىڭ كەڭسەسى كونستيتۋتسيالىق سوتتىڭ شەشىمىن قۇپتاپ، ونىڭ پارلامەنتتىڭ ءوز وكىلەتتىكتەرىن اسىرا پايدالانعانىن كورسەتتى دەپ مالىمدەدى. حان دوك سۋ ءوزىنىڭ پرەزيدەنتتىك مىندەتتەرىنە قايتا ورالىپ، ساۋدا سياقتى ماڭىزدى ماسەلەلەرمەن اينالىسۋعا ۋادە بەردى، دەپ حابارلايدى Reuters اگەنتتىگى.
2024 جىلعى 3 جەلتوقساندا وڭتۇستىك كورەيا پرەزيدەنتى يۋن سوك يول ەلدە اسكەري جاعداي ەنگىزىلەتىنىن جاريالادى، بۇل شەشىمدى ول «وپپوزيتسيانىڭ مەملەكەتكە قارسى ارەكەتتەرىمەن» ءتۇسىندىردى. بىراق ەل پارلامەنتى بۇل شەشىمدى ماقۇلداۋدان باس تارتىپ، كەلەسى كۇنى مەملەكەت باسشىسى بۇل شەشىمىن كەرى قايتاردى. 14 جەلتوقسان كۇنى پارلامەنت يۋنعا يمپيچمەنت جاريالادى.
وسىدان كەيىن، ەل كونستيتۋتسياسىنا سايكەس، پرەزيدەنتتىڭ مىندەتىن ۋاقىتشا اتقارۋشى ۇكىمەت باسشىسى حان دوك سۋ بولدى. بىراق 27 جەلتوقساندا پارلامەنت وعان دا يمپيچمەنت جاريالادى. بۇل شەشىمنىڭ سەبەبى – حاننىڭ كونستيتۋتسيالىق سوتقا يۋننىڭ شەتتەتىلگەنىن رەسمي تۇردە بەكىتۋ ءۇشىن تاعى ءۇش سۋديا تاعايىنداۋدان باس تارتۋى بولدى.
سودان كەيىن ەل پرەزيدەنتىنىڭ مىندەتىن ۋاقىتشا قارجى ءمينيسترى جانە پرەمەر-ءمينيستردىڭ ورىنباسارى چحۆە سان موك اتقاردى.
قۋىلعان پرەزيدەنت كوتەرىلىسكە جەتەكشىلىك ەتتى جانە بيلىكتى اسىرا پايدالاندى دەگەن ايىپتارمەن تەرگەلدى. ول ءۇش رەت كۇدىكتى رەتىندە جاۋاپ الۋعا كەلمەگەن سوڭ، سوت ونى قاماۋعا الۋ تۋرالى سانكتسيا بەردى. قاڭتاردىڭ 15-ءى كۇنى كۇزەتشىلەردىڭ قارسىلىق كورسەتۋ ارەكەتىنە قاراماستان يۋن رەزيدەنتسياسىندا قاماۋعا الىندى. پرەزيدەنت قاماۋعا الىنعاننان كەيىن سەۋلدە تارتىپسىزدىكتەر باستالدى.
7 ناۋرىزدا سەۋلدىڭ ورتالىق اۋداندىق سوتى يۋن سوك ءيولدىڭ قورعاۋشىسىنىڭ ءوتىنىشىن قاناعاتتاندىرىپ، ونىڭ تۇتقىندالعان وردەرىن جويدى. كەلەسى كۇنى 64 جاستاعى ساياساتكەر قاماۋدان بوساتىلدى. دەگەنمەن، ول ءالى دە تەرگەۋدە.
يۋنعا قارسى كوتەرىلىس ۇيىمداستىرعانى ءۇشىن تاعىلعان ايىپتاردىڭ سوتى 14 ساۋىردە باستالادى، دەپ حابارلايدى Reuters.
