حح عاسىردىڭ ەڭ تانىمال تىڭشىلاردىڭ ءبىرى سانالاتىن ولەگ گورديەۆسكي ۇلىبريتانيادا ءوز ۇيىندە 87 جاسىندا قايتىس بولدى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
قايتىس بولۋىنىڭ سەبەپتەرى ازىرگە حابارلانعان جوق.
1970-80 جىلدارى گورديەۆسكي مەملەكەتتىك قاۋىپسىزدىك كوميتەتىنىڭ (مقك) ءبىرىنشى باس باسقارماسىندا 15 جىل بويى ۇلىبريتانيا مەن سكانديناۆيانى قاداعالاعان.
ول ۇلىبريتانياعا مقك رەزيدەنتى رەتىندە جىبەرىلگەن، الايدا كوپ ۇزاماي MI-6 بريتاندىق قارسى بارلاۋ قىزمەتىمەن (كەيىن MI-5-پەن دە) "OVATION" لاقاپ اتىمەن ىنتىماقتاستىق ورناتقان. بۇل بايلانىس 11 جىلعا سوزىلىپ، 1985 جىلى ماسكەۋ ونى كۇدىكتەنىپ، رەسەيگە قايتارعان. بىراق سول جىلى بريتاندىق ارنايى قىزمەتتەر قۇپيا وپەراتسيا جۇرگىزىپ، ونى ۇلىبريتانياعا قايتا الىپ كەتكەن.
كسرو ونى سىرتتاي اتۋ جازاسىنا كەسسە، قازىرگى رەسەي ونى ساتقىن دەپ جاريالادى. بۇرىنعى ارىپتەستەرى ونى "قاتىگەز ادام" جانە ء"وز مۇددەسىن بارىنەن جوعارى قوياتىن ادام" دەپ سيپاتتاسا، باتىستا وعان مۇلدەم باسقا باعا بەرىلدى.
گورديەۆسكيدىڭ ارقاسىندا باتىس ەلدەرى كەڭەس وداعىندا شىن مانىندە نە ويلاپ، قانداي ساياسات جۇرگىزىلىپ جاتقانىن تۇسىنۋگە مۇمكىندىك الدى. ول قىرعي-قاباق سوعىستىڭ باعىتىن وزگەرتكەن ادام رەتىندە سانالادى.
2007 جىلى ۇلىبريتانيا قاۋىپسىزدىگىنە قوسقان ۇلەسى ءۇشىن ولەگ گورديەۆسكي ەلدىڭ ەڭ جوعارى ماراپاتتارىنىڭ ءبىرى اۋليە ميحايل مەن گەورگي وردەنىمەن ماراپاتتالدى.
گورديەۆسكيدىڭ ايتۋىنشا، ونى كسرو-عا قارسى شىعۋعا يتەرمەلەگەن باستى وقيعا – 1968 جىلعى چەحوسلوۆاكياعا باسىپ كىرۋ بولعان.
"بۇل كەڭەس وداعى مەن باسقا كوممۋنيستىك ەلدەردىڭ چەحوسلوۆاكياعا اشىق تۇردە باسىپ كىرۋى بولدى. بۇل مەن ءۇشىن شەكتەن شىققان وقيعا ەدى. سول كەزدە مەن شەشىم قابىلدادىم – وسى قىلمىستىق، سۇمدىق جۇيەگە قىزمەت ەتۋدى دوعارامىن", – دەپ ەسكە العان ەدى ول 2008 جىلى.
ولەگ گورديەۆسكي ولتىرىلگەن جوق. ونىڭ ولىمىنە قاتىستى تەرگەۋگە تەرروريزمگە قارسى كۇرەس ءبولىمى قىزمەتكەرلەرى كومەكتەسىپ جاتقانىنا قاراماستان، قاساقانا ءولتىرۋ بەلگىلەرى جوق.
الايدا گورديەۆسكي قازىرگى رەسەي بۇرىنعى قۇپيالارىن اشقانداردى كەشىرمەيتىنىن جاقسى تۇسىنەتىن.
