اقتوبە وبلىسىنىڭ قاندىاعاش قالاسىندا بولعان جان تۇرشىگەرلىك وقيعاعا قاتىستى دارىگەرلەر مالىمەت بەردى، دەپ حابارلايدى "ادىرنا" ۇلتتىق پورتالى.
بۇل وقيعادا ايەل ءوزىنىڭ ەكى كىشكەنتاي بالاسىن ءولتىردى دەگەن كۇدىككە ىلىنگەن ەدى.
دەنساۋلىق ساقتاۋ باسقارماسىنىڭ مالىمەتىنشە، جەدەل جاردەم توبى وقيعا ورنىنا جەتكەن كەزدە بالالاردا تىرشىلىك بەلگىلەرى بولماعان.
"جەدەل جاردەم بريگاداسى كورسەتىلگەن مەكەنجايعا ساعات 13:25-تە جەتتى. دارىگەرلەر كەلگەن ساتتە بالالاردىڭ ەكەۋى دە قايتىس بولعان. الدىن الا مالىمەت بويىنشا، ولاردى تۇنشىقتىرعان. دەنەلەرىندە اسفيكسيا بەلگىلەرى بولعان", – دەپ حابارلادى ۆەدومستۆو.
سونداي-اق، باسقارما دەرەكتەرىنە سۇيەنسەك، قازا تاپقان بالالاردىڭ اناسى قاندىاعاش قالاسىنا اتىراۋ وبلىسىنان 14 ناۋرىز كۇنى اتا-اناسىنا قوناققا كەلگەن.
رەسمي راستالماعان اقپاراتقا سايكەس، ايەل ءوز بالالارىن جاستىقپەن تۇنشىقتىرعان.
ەسكە سالا كەتەيىك، 23 ناۋرىزدا قاندىاعاش قالاسىنداعى ۇيلەردىڭ بىرىندە ءۇش جاستاعى جانە 11 ايلىق بالالاردىڭ ءولى دەنەسى تابىلعان ەدى. ولاردى ولتىرگەن كۇدىكتى رەتىندە انالارى ۇستالعان.
