Aqtóbe oblysynyń Qandyaǵash qalasynda bolǵan jan túrshigerlik oqıǵaǵa qatysty dárigerler málimet berdi, dep habarlaıdy "Adyrna" ulttyq portaly.
Bul oqıǵada áıel óziniń eki kishkentaı balasyn óltirdi degen kúdikke ilingen edi.
Densaýlyq saqtaý basqarmasynyń málimetinshe, jedel járdem toby oqıǵa ornyna jetken kezde balalarda tirshilik belgileri bolmaǵan.
"Jedel járdem brıgadasy kórsetilgen mekenjaıǵa saǵat 13:25-te jetti. Dárigerler kelgen sátte balalardyń ekeýi de qaıtys bolǵan. Aldyn ala málimet boıynsha, olardy tunshyqtyrǵan. Denelerinde asfıksııa belgileri bolǵan", – dep habarlady vedomstvo.
Sondaı-aq, basqarma derekterine súıensek, qaza tapqan balalardyń anasy Qandyaǵash qalasyna Atyraý oblysynan 14 naýryz kúni ata-anasyna qonaqqa kelgen.
Resmı rastalmaǵan aqparatqa sáıkes, áıel óz balalaryn jastyqpen tunshyqtyrǵan.
Eske sala keteıik, 23 naýryzda Qandyaǵash qalasyndaǵy úılerdiń birinde úsh jastaǵy jáne 11 aılyq balalardyń óli denesi tabylǵan edi. Olardy óltirgen kúdikti retinde analary ustalǵan.
