تۇركيانىڭ Baykar كومپانياسى ازىرلەگەن Bayraktar KIZILELMA ۇشقىشسىز اسكەري ۇشاعى اۋەدە جىلدامدىق پەن باعىتتى وزگەرتۋ سىناعىنان ءساتتى ءوتتى، دەپ حابارلايدى "ادىرنا" ۇلتتىق پورتالى Anadolu Ajansı-گە سىلتەمە جاساپ.
Baykar كومپانياسىنىڭ مالىمدەۋىنشە، Bayraktar KIZILELMA-نى سىناقتان وتكىزۋ پروتسەسى جوسپارلانعان كەستەگە سايكەس جالعاسۋدا.
كومپانيانىڭ حابارلاۋىنشا، PT3 – سەريالىق ءپروتوتيپى (بورتتىق ءنومىرى TC-OZB3) 21 ناۋرىز كۇنى تۇركيانىڭ سولتۇستىك-باتىسىنداعى تەكيرداگ پروۆينتسياسىنىڭ چورلۋ اۋدانىندا ورنالاسقان AKINCI وقۋ-سىناق ورتالىعىنان اۋەگە كوتەرىلىپ، جۇيەنى سايكەستەندىرۋ شارالارىن جانە كۇردەلى مانەۆرلەردى ءساتتى ورىندعان.
سەريالىق پروتوتيپكە العاشقى نۇسقالاردى ازىرلەۋ كەزىندە الىنعان تاجىريبەلەر نەگىزىندە ايتارلىقتاي وزگەرىستەر ەنگىزىلگەن. ۇشۋ بالامالى فورساجدىق قوزعالتقىشتى پايدالانۋ ارقىلى جۇزەگە اسىرىلىپ، ونىڭ ينتەگراتسياسى ءساتتى اياقتالدى. جاڭا قۋاتتى قوزعالتقىشتىڭ ارقاسىندا Bayraktar KIZILELMA دىبىس جىلدامدىعىنا جاقىندايدى جانە جەتىلدىرىلگەن اەروديناميكاسى ارقىلى جوعارى جىلدامدىقتا مانەۆر جاساۋ قابىلەتىن ارتتىرعان.
سونىمەن قاتار، AESA راديولوكاتورى ارقىلى جوعارى دەڭگەيدەگى جاعدايدى باقىلاۋ مۇمكىندىگىنە يە بولىپ، ەڭ كۇردەلى تاپسىرمالاردى ورىنداۋعا قاۋقارى جەتەدى.
Bayraktar KIZILELMA جوباسى 2021 جىلدان بەرى ازىرلەنىپ كەلەدى. بورتتىق ءنومىرى TC-ÖZB اپپاراتى 2022 جىلعى 14 قاراشادا وندىرىستەن شىعارىلىپ، تۋرا ءبىر ايدان كەيىن العاش رەت اۋەگە كوتەرىلدى. وسىلايشا، Bayraktar KIZILELMA رەكوردتىق قىسقا مەرزىمدە ۇشىرىلدى.
2023 جىلى ستامبۇلدا وتكەن الەمدەگى ەڭ ءىرى اۆياتسيا، عارىش جانە تەحنولوگيا فەستيۆالى (TEKNOFEST) بارىسىندا Bayraktar KIZILELMA ءوزىنىڭ ەرەكشە ۇشۋ مۇمكىندىكتەرىن كورسەتىپ، الەمدىك اۆياتسيا تاريحىنا ەندى.
الەمدەگى ەڭ ءىرى ۇشقىشسىز ۇشۋ اپپاراتتارىن ءوندىرۋشى Baykar كومپانياسى قازىرگى ۋاقىتتا Bayraktar TB2 SİHA-نى 34 ەلگە، ال Bayraktar AKINCI TİHA-نى 11 ەلگە ەكسپورتتاۋ تۋرالى كەلىسىمدەردى جۇزەگە اسىرىپ جاتىر.
