جامبىل وبلىسى، ت. رىسقۇلوۆ اۋدانىنا قاراستى قىزىلشارۋا اۋىلىندا ناۋرىز مەيرامىن تويلاۋ كەزىندە كۇتپەگەن وقيعا ورىن الدى. تەاترلاندىرىلعان قويىلىم بارىسىندا جىلقى ۇركىپ، ساحنا ماڭىندا وتىرعان كورەرمەندەرگە قاراي شاۋىپ كەتكەن، دەپ حابارلايدى “ادىرنا” ۇلتتىق پورتالى.
اۋدان اكىمدىگى وقيعاعا قاتىستى تۇسىنىكتەمە بەردى.
“22 ناۋرىز 2025 جىلى ت. رىسقۇلوۆ اۋدانى، اقبۇلاق اۋىلدىق وكرۋگىنىڭ قىزىلشارۋا اۋىلىندا وتكەن ناۋرىز مەيرامىندا تەاترلاندىرىلعان قويىلىم كەزىندە جىلقى شوشىپ، كورەرمەندەرگە قاراي شابۋىلدادى. ابىروي بولعاندا، زارداپ شەككەندەر جوق. وقيعادان كەيىن مەرەكە ءوز جالعاسىن تاپتى.”
وقيعا ورنىنان تۇسىرىلگەن بەينەجازبالار الەۋمەتتىك جەلىلەردە كەڭىنەن تارالۋدا. العاشقىدا وقيعا ماڭعىستاۋ وبلىسىندا بولدى دەگەن اقپارات تاراعانىمەن، كەيىنىرەك ونىڭ جامبىل وبلىسىندا بولعانى انىقتالدى.
بەينەجازبادا جىلقىنىڭ شاباندوزدىڭ باسقارۋىنان شىعىپ، كورەرمەندەر وتىرعان جاققا قاراي شاۋىپ كەتكەنى كورىنەدى. كەيبىر ادامدار قۇلاپ، بالالاردىڭ جىلاعان داۋىسى ەستىلگەن. الايدا، جىلقى كوپكە ۇزاماي وقيعا ورنىنان الىستاپ كەتكەن.
ۇلتتىق ويىن كەزىندە ءجاسوسپىرىم جاراقات الدى.
ايتا كەتەيىك، پاۆلوداردا دا 2008 جىلى تۋعان بالا ۇلتتىق ويىن – "قۇنان بايگەگە" قاتىسىپ، جاراقات العان. شاباندوزدىق جارىس كەزىندە ات ۇركىپ، جارىق باعاناسىنا سوعىلعان. ءجاسوسپىرىم قۇلاپ، سالدارىنان اۋىر باس-مي جاراقاتىن الىپ، جانساقتاۋ بولىمىنە جەتكىزىلدى.
